காதலி உயிரிழந்த வழக்கில் ஜாமீனில் வந்து மீண்டும் நண்பர்களுடன் போதை காளான் பயன்படுத்திய கல்லூரி மாணவன் !

நீலகிரி வனப்பகுதியில் மிக ஆபத்தான 'மேஜிக் மஷ்ரூம்' எனப்படும் போதை காளான்களைப் பறித்துப் பயன்படுத்திய ஊட்டியைச் சேர்ந்த 4 கல்லூரி மாணவர்களைப் போலீஸார் அதிரடியாகக் கைது செய்தனர். கைதானவர்களில் ஆகாஷ் என்ற மாணவன், கடந்த 2024 ஆம் ஆண்டில் தனது காதலியுடன் சேர்ந்து இதே போன்று போதை காளான் உட்கொண்டதாகக் காவல் துறை வட்டாரங்கள் தெரிவிக்கின்றன. அப்போது அந்த நச்சுப் போதையின் வீரியம் தாங்காமல் அவரது கண் முன்னேயே அவரது காதலி பரிதாபமாக உயிரிழந்தார்.

காதலி உயிரிழந்த அந்தப் பயங்கர வழக்கில் அண்மையில் ஜாமீனில் வெளியே வந்த போதிலும், ஆகாஷுக்குப் போதை வெறி சிறிதும் அடங்கவில்லை என்று கூறப்படுகிறது. இதனால் அவர் மீண்டும் தனது கல்லூரி நண்பர்கள் 3 பேருடன் சேர்ந்து அடர்ந்த வனப்பகுதிக்குள் நுழைந்து ரகசியமாகப் போதை காளான்களைப் பறித்துள்ளார். அதனைப் பதப்படுத்தி அனைவரும் ஒன்றாகப் பயன்படுத்திய போது, அங்கு ரகசியத் தகவலின் பேரில் கண்காணிப்பில் ஈடுபட்டிருந்த தனிப்படை போலீசாரிடம் அவர்கள் கையும் களவுமாகப் பிடிபட்டனர்.

இளைஞர்களின் எதிர்காலத்தைச் சீரழிக்கும் இத்தகைய போதை காளான்களைப் பறித்துப் பயன்படுத்திய குற்றத்திற்காக 4 மாணவர்கள் மீதும் வனத்துறை மற்றும் காவல் துறையினர் வழக்குப் பதிவு செய்துள்ளனர். கடந்த 2024 இல் நடந்த மரணச் சம்பவத்திற்குப் பிறகும் இம்மாணவன் திருந்தாமல் மீண்டும் இதே குற்றத்தில் ஈடுபட்டது போலீசாரையே அதிர்ச்சியில் ஆழ்த்தியுள்ளது. கல்லூரி மாணவர்களின் இந்த விபரீதப் போதைப் பழக்கம் மற்றும் கைது நடவடிக்கை ஊட்டிப் பகுதி பெற்றோர்களிடையே பெரும் கலக்கத்தை ஏற்படுத்தியுள்ளது.