ஆப்கானிஸ்தானில் கோரத் தாண்டவமாடிய நிலநடுக்கம்.. .கட்டிடங்கள் இடிந்து 8 பேர் பலி! 5.8 ரிக்டர் ஆக பதிவு!

ஆப்கானிஸ்தானின் வடக்கு மாகாணமான குண்டூஸில் நேற்று இரவு ஏற்பட்ட நிலநடுக்கம் பெரும் உயிர்ச் சேதத்தை ஏற்படுத்தியுள்ளது. இரவு 10 மணியளவில் மக்கள் உறங்கிக் கொண்டிருந்த நேரத்தில் இந்த இயற்கைச் சீற்றம் நிகழ்ந்துள்ளது.

ஆப்கானிஸ்தானின் இந்துகுஷ் மலைத்தொடர் பகுதியில் ரிக்டர் அளவுகோலில் 5.8 ஆக இந்த நிலநடுக்கம் பதிவாகியுள்ளது. நிலநடுக்கத்தின் அதிர்வுகள் ஆப்கானிஸ்தான் மட்டுமல்லாமல் பாகிஸ்தான் மற்றும் இந்தியாவின் வட மாநிலங்களிலும் உணரப்பட்டன. நிலநடுக்கம் ஏற்பட்ட சில விநாடிகளிலேயே குண்டூஸ் மாகாணத்தில் பல வீடுகள் மற்றும் பழைய கட்டிடங்கள் இடிந்து தரைமட்டமாகின.

கட்டிட இடிபாடுகளில் சிக்கி இதுவரை 8 பேர் உயிரிழந்துள்ளனர். பலி எண்ணிக்கை மேலும் உயரக்கூடும் என அஞ்சப்படுகிறது. நூற்றுக்கணக்கானோர் காயமடைந்து உள்ளூர் மருத்துவமனைகளில் அனுமதிக்கப்பட்டுள்ளனர். பலரது நிலைமை கவலைக்கிடமாக இருப்பதாக மருத்துவமனை வட்டாரங்கள் தெரிவிக்கின்றன.

மலைப்பாங்கான பகுதிகளில் நிலச்சரிவு ஏற்பட்டுள்ளதால் போக்குவரத்து துண்டிக்கப்பட்டுள்ளது. தொலைத்தொடர்பு வசதிகளும் பல இடங்களில் பாதிக்கப்பட்டுள்ளன.

ஆப்கானிஸ்தான் பேரிடர் மேலாண்மைத் துறை மற்றும் ராணுவத்தினர் இணைந்து மீட்புப் பணிகளில் ஈடுபட்டுள்ளனர். இடிபாடுகளுக்குள் சிக்கியுள்ளவர்களை மீட்கும் பணி போர்க்கால அடிப்படையில் நடைபெற்று வருகிறது. பாதிக்கப்பட்ட மக்களுக்குத் தேவையான உணவு மற்றும் மருத்துவ உதவிகளை வழங்கத் தன்னார்வ அமைப்புகள் முன்வந்துள்ளன.