7.1 ரிக்டர் அளவில் புரட்டிப் போட்ட சக்திவாய்ந்த நிலநடுக்கம்... 13 பேர் பரிதாப பலி!

தென்மேற்கு ஜப்பானின் கியூஷு தீவில் அமைந்துள்ள குமாமோட்டோ பகுதியில் செவ்வாய்க்கிழமை ரிக்டர் அளவில் 7.1 ஆகப் பதிவான சக்திவாய்ந்த நிலநடுக்கம் ஏற்பட்டது. இந்த நிலநடுக்கத்தின் காரணமாகப் பல கட்டிடங்கள், வீடுகள் மற்றும் வணிக வளாகங்கள் இடிந்து தரைமட்டமாகிப் பெருத்த சேதத்தைச் சந்தித்துள்ளன. நிலநடுக்கத்தில் சிக்கி இதுவரை 13 பேர் பரிதாபமாக உயிரிழந்துள்ளதாக ஜப்பான் பிரதமர் சனாயே தகாய்ச்சி அதிகாரப்பூர்வமாகத் தெரிவித்துள்ளார். மேலும் நிலநடுக்கத்தால் தூண்டப்பட்ட திடீர் விபத்துகள், தீ விபத்துகள் மற்றும் இடிபாடுகள் காரணமாகப் பல நூற்றுக்கணக்கானோர் படுகாயம் அடைந்துள்ளனர்.

நிலநடுக்கம் ஏற்பட்ட உடனடியாக மீட்புக் குழுவினர், தீயணைப்புத் துறையினர் மற்றும் இராணுவத்தினர் சம்பவ இடங்களுக்கு விரைந்து சென்று மீட்புப் பணிகளை முடுக்கிவிட்டனர். கட்டிட இடிபாடுகளுக்குள் சிக்கித் தவிக்கும் மக்களை மீட்கும் கடினமான சவாலான பணிகள் இரவென்றும் பாராமல் தொடர்ச்சியாக நடைபெற்று வருகின்றன. குறிப்பாகக் குமாமோட்டோ பகுதியில் உள்ள பெரிய வணிக வளாகம் ஒன்றில் நிகழ்ந்த வெடிவிபத்து மற்றும் இடிபாடுகளில் பலர் சிக்கியுள்ளதாகப் அஞ்சப்படுகிறது.

அத்துடன் தொழிற்சாலை ஒன்றின் புகைபோக்கி இடிந்து விழுந்ததில் சிலர் காணாமல் போயுள்ளதாகவும், அவர்களைத் தேடும் பணிகள் தீவிரமாக நடப்பதாகவும் கூறப்பட்டுள்ளது. பாதிக்கப்பட்ட பகுதிகளில் உள்ள பல்லாயிரக்கணக்கான வீடுகளில் மின்சாரம் மற்றும் குடிநீர் விநியோகம் முற்றிலும் தடைபட்டுப் பொதுமக்கள் தவித்து வருகின்றனர். இதனால் பொதுமக்கள் அனைவரும் பாதுகாப்பாகப் பள்ளி கட்டிடங்கள் மற்றும் அரசின் இடைக்கால நிவாரண முகாம்களில் தஞ்சம் அடைந்துள்ளனர். மேலும் அதிர்வுகள் தொடரக் கூடும் என்பதால் பொதுமக்கள் அனைவரும் விழிப்புடன் பாதுகாப்பு வழிமுறைகளைப் பின்பற்றும்படி  அதிகாரிகள் எச்சரிக்கை விடுத்துள்ளனர்.