காங்கோவில் அதிவேகமாகப் பரவும் எபோலா வைரஸ் - 754 பேர் பலி!

மத்திய கிழக்கு ஆப்பிரிக்க நாடான காங்கோவில் உலகிலேயே மிகக் கொடிய நோய்களில் ஒன்றான எபோலா வைரஸ் பாதிப்பு மிக வேகமாகப் பரவி வருகிறது. காங்கோ மட்டுமன்றி உகாண்டா, லைபீரியா போன்ற பிற ஆப்பிரிக்க நாடுகளிலும் இந்த வைரஸின் தாக்கம் அச்சுறுத்தலை ஏற்படுத்தியுள்ளது. எபோலா வைரஸ் பரவல் தீவிரமடைந்து வருவதன் காரணமாக, அமெரிக்கா உள்ளிட்ட பல்வேறு உலக நாடுகளும் காங்கோ போன்ற ஆப்பிரிக்க நாடுகளுடனான தங்களது சர்வதேச விமான போக்குவரத்திற்குப் பல கடுமையான கட்டுப்பாடுகளை விதித்துள்ளன.

காங்கோ நாட்டின் சுகாதாரத்துறை அமைச்சகம் வெளியிட்டுள்ள அதிகாரப்பூர்வ அறிவிப்பின்படி, இதுவரை நாடு முழுவதும் மொத்தம் 2,011 பேருக்கு எபோலா வைரஸ் தொற்று இருப்பது உறுதி செய்யப்பட்டுள்ளது. இந்தக் கொடிய வைரஸ் பாதிப்பால் உயிரிழந்தவர்களின் எண்ணிக்கை தற்பொழுது 754 ஆக உயர்ந்துள்ளது. குறிப்பாக, காங்கோவின் முக்கிய மாகாணங்களான இடுரி, வடக்கு கிவு மற்றும் தெற்கு கிவு  ஆகிய பகுதிகளில் தான் இந்த வைரஸின் தாக்கம் மிகத் தீவிரமாக இருப்பதாகச் சுகாதாரத்துறை அதிகாரிகள் கவலை தெரிவித்துள்ளனர்.

எபோலா வைரஸ் ஒருபுறம் உயிர்களைப் பலிவாங்கி வரும் இக்கட்டான சூழ்நிலையில், காங்கோ நாட்டு மருத்துவப் பணியாளர்கள் திடீரென வேலைநிறுத்தப் போராட்டத்தில் குதித்துள்ளனர். அளவுக்கு அதிகமான பணிச்சுமை, நீண்ட நாட்களாக நிலுவையில் உள்ள ஊதிய உயர்வு உள்ளிட்ட கோரிக்கைகளை வலியுறுத்தி இந்த வேலைநிறுத்தம் தற்போது முன்னெடுக்கப்பட்டுள்ளது. நாடு முழுவதும் சுகாதார அவசரநிலை போன்ற சூழல் நிலவி வரும் வேளையில், அதற்கு நடுவே மருத்துவப் பணியாளர்கள் போராட்டத்தில் ஈடுபட்டு வருவது நோயாளிகளின் சிகிச்சையைப் பாதிப்பதுடன், அந்நாட்டில் பெரும் பரபரப்பையும் அச்சத்தையும் ஏற்படுத்தியுள்ளது.