"என்னுடைய மகன் அரசியலுக்கு வரமாட்டார்"- எடப்பாடி பழனிசாமி!

சென்னை தலைமைச் செயலக வளாகத்தில் இன்று செய்தியாளர்களைச் சந்தித்த அதிமுக பொதுச் செயலாளர் எடப்பாடி பழனிசாமி, தனது குடும்பத்தினர் அரசியல் வாரிசாகக் களம் இறக்கப்பட உள்ளதாக வெளியாகும் தகவல்களுக்குத் திட்டவட்டமாக மறுப்புத் தெரிவித்து முற்றுப்புள்ளி வைத்தார். தனது மகன் மிதுன் தீவிர அரசியலுக்கு வரப்போகிறார் என்று பரவி வரும் செய்திகள் முற்றிலும் வதந்தியானவை என்று அவர் உறுதியாகக் குறிப்பிட்டுள்ளார்.

அதிமுகவிற்குள் தற்பொழுது தலைமை மாற்றம் மற்றும் உட்கட்சி விவாதங்கள் எழுந்துள்ள சூழலில், தனது மகன் மிதுன் குறித்து எடப்பாடி பழனிசாமி பின்வருமாறு விளக்கம் அளித்தார். "என்னுடைய மகன் மிதுன் எக்காரணத்தைக் கொண்டும் அரசியலுக்கு வரமாட்டார் என்பதை இங்கு நான் திட்டவட்டமாகக் கூறிக் கொள்கிறேன். அவர் அதிமுகவில் ஒரு சாதாரண அடிப்படை உறுப்பினர் மட்டுமே. அதைத் தாண்டி அவருக்குக் கட்சியில் எந்தவொரு பதவியோ அல்லது அரசியல் ஈடுபாடோ கிடையாது. எனவே, திட்டமிட்டுப் பரப்பப்படும் இத்தகைய அவதூறுச் செய்திகளை யாரும் நம்ப வேண்டாம்."

"கட்சியின் பலம் மற்றும் எதிர்காலம் குறித்துப் பேசிய எடப்பாடி பழனிசாமி, அதிமுக ஒரு தொண்டர்கள் இயக்கம் என்பதை மீண்டும் நிலைநாட்டினார். அதிமுக என்பது பல சோதனைகளைக் கடந்து வந்த ஒரு எஃகு கோட்டை. இது சில நபர்களால் இயங்கும் கட்சி அல்ல, கோடிக்கணக்கான தொண்டர்களின் இரத்தத்தால் உருவான வலிமையான இயக்கம்.

அண்மைக்காலமாக அதிமுக சரிந்து வருவதாகப் பரப்பப்படும் அரசியல் விமர்சனங்களை நிராகரித்த அவர், இந்த இயக்கத்தை வீழ்த்துவதற்கு இன்னும் எந்தவொரு கொம்பனும் பிறக்கவில்லை என்று ஆவேசமாகத் தெரிவித்தார்.

அதிமுகவின் மூத்த தலைவர் சி.வி.சண்முகம் "அதிமுக ஒரு தனிக்குடும்பத்தின் பிடிக்குள் சென்று கொண்டிருக்கிறது" என்று அதிருப்தி வெளியிட்டிருந்ததாக அரசியல் வட்டாரங்களில் செய்திகள் கசிந்த நிலையில், அதற்குப் பதிலடி கொடுக்கும் விதமாக "எனது மகன் அரசியலுக்கு வரமாட்டார்; இது குடும்ப அரசியல் கட்சி அல்ல" என எடப்பாடி பழனிசாமி பகிரங்கமாகப் பிரகடனம் செய்திருப்பது குறிப்பிடத்தக்கது.