இபிஎஸ் vs ஓபிஎஸ்: யாருக்குச் சொத்து அதிகம்? வேட்புமனுவில் வெளியான தகவல்கள்!

தமிழகத் தேர்தலை முன்னிட்டு முக்கிய அரசியல் தலைவர்கள் தங்களது சொத்து விவரங்களைத் தேர்தல் ஆணையத்திடம் சமர்ப்பித்துள்ளனர். இதில் முன்னாள் முதலமைச்சர்களான எடப்பாடி பழனிசாமி மற்றும் ஓ. பன்னீர்செல்வம் ஆகியோரின் சொத்து மதிப்பு குறித்தத் தகவல்கள் அரசியல் வட்டாரத்தில் பேசுபொருளாகியுள்ளன.

சேலம் மாவட்டம் எடப்பாடி தொகுதியில் 8-வது முறையாகப் போட்டியிடும் அதிமுக பொதுச்செயலாளர் இபிஎஸ் தாக்கல் செய்துள்ள  சொத்து மதிப்பு விவரங்களில், எடப்பாடி பழனிசாமி பெயரில் ரூ.50 லட்சம் மதிப்பிலான அசையும் சொத்துக்கள் மட்டுமே உள்ளன. ஆச்சரியப்படும் விதமாக, அவர் பெயரில் அசையாச் சொத்துக்களோ அல்லது விவசாய நிலங்களோ ஏதுமில்லை எனக் குறிப்பிட்டுள்ளார்.

எடப்பாடி மனைவி ராதா பெயரில் ரூ.3.45 கோடி மதிப்பிலான அசையாச் சொத்துக்களும், ரூ.2.16 கோடி மதிப்பிலான அசையும் சொத்துக்களும் உள்ளன. மேலும் அவருக்கு 6 இடங்களில் நிலமும், ஒரு பண்ணை வீடும் இருப்பதாகத் தெரிவிக்கப்பட்டுள்ளது. இபிஎஸ் பெயரில் ரூ.17 லட்சம் கடன் இருப்பதாக வேட்புமனுவில் கூறப்பட்டுள்ளது.

ஓ. பன்னீர்செல்வம் (ஓபிஎஸ்) - சொத்து விவரம்:

தேனி மாவட்டம் போடிநாயக்கனூர் தொகுதியில் (இம்முறை திமுக கூட்டணியில் உதயசூரியன் சின்னத்தில் போட்டியிடுவதாகத் தகவல்) போட்டியிடும் ஓ. பன்னீர்செல்வம் தாக்கல் செய்துள்ள சொத்து விவரங்களில், ஓபிஎஸ் பெயரில் ரூ.9.18 கோடி மதிப்பிலான அசையாச் சொத்துக்கள் உள்ளன. அவரது பெயரில் ரூ.2.94 கோடி மதிப்பிலான அசையும் சொத்துக்கள் இருப்பதாகத் தெரிவிக்கப்பட்டுள்ளது. ஓபிஎஸ்-க்கு வங்கிகளில் ரூ.5.41 கோடி கடன் இருப்பதாக வேட்புமனுவில் குறிப்பிடப்பட்டுள்ளது.

எடப்பாடி பழனிசாமி இதுவரை 5 முறை இத்தொகுதியில் வெற்றி பெற்றுள்ளார்.  ஓபிஎஸ் இம்முறை புதிய அரசியல் சூழலில் போடி தொகுதியில் களம் காண்கிறார். ஓபிஎஸ் இருமுறை தமிழகத்தின் முதல்வராகவும் பதவி வகித்துள்ளார். எடப்பாடி ஒருமுறை தமிழகத்தின் முதல்வராக பதவி வகித்துள்ளார்.