ஈரோட்டில் மாயமான 9-ம் வகுப்பு மாணவர்கள் 2 பேர் தஞ்சையில் மீட்பு!
ஈரோடு மாவட்டத்தில் பள்ளி முடிந்து டியூஷனுக்குச் சென்றுவிட்டு வீடு திரும்பாமல் மாயமான 9-ம் வகுப்பு மாணவர்கள் இருவர், சுமார் 10 மணி நேர தேடுதலுக்குப் பிறகு தஞ்சாவூரில் மீட்கப்பட்டனர்.
டியூஷனுக்குச் சென்றவர்கள் வீடு திரும்பவில்லை
ஈரோடு மாவட்டம் சித்தோடு அருகே உள்ள நசியனூர் பள்ளியில் ஸ்ரீதர், லட்சுமணன் ஆகிய இருவரும் 9-ம் வகுப்பு படித்து வந்தனர். இந்நிலையில், நேற்று பள்ளி முடிந்ததும் டியூஷனுக்குச் சென்ற இருவரும் நீண்ட நேரமாகியும் வீடு திரும்பவில்லை.
இதனால் அதிர்ச்சியடைந்த பெற்றோர், பல்வேறு இடங்களில் தேடியும் மாணவர்களைக் கண்டுபிடிக்க முடியாததால் சித்தோடு காவல் நிலையத்தில் புகார் அளித்தனர். இதையடுத்து போலீசார் விசாரணை நடத்தி மாணவர்களைத் தேடி வந்தனர்.
தஞ்சாவூரில் மீட்பு
சுமார் 10 மணி நேரத் தேடுதலுக்குப் பிறகு, மாயமான இரு மாணவர்களும் தஞ்சாவூரில் போலீசாரால் மீட்கப்பட்டனர். அவர்களிடம் நடத்தப்பட்ட முதற்கட்ட விசாரணையில், படிப்பதில் விருப்பமில்லாததால் வேலை தேடி தஞ்சாவூருக்குச் சென்றதாகத் தெரிவித்துள்ளனர்.
இதையடுத்து மாணவர்களுக்கு போலீசார் அறிவுரை வழங்கி, அவர்களைப் பெற்றோரிடம் ஒப்படைத்தனர்.