தமிழகம் முழுவதும் ஜூலை 20-ல் இ-சேவை மையங்கள் வேலைநிறுத்தம் - சேவைகள் முடங்கும் அபாயம்!

சம்பளப் பிடித்தம் மற்றும் அடிப்படைச் சலுகைகள் மறுக்கப்படுவதைக் கண்டித்து, வரும் ஜூலை 20-ஆம் தேதி தமிழகம் முழுவதும் உள்ள அரசு இ-சேவை மையங்கள் மற்றும் சேர்க்கை மையங்கள் முற்றிலும் மூடப்படும் எனத் தமிழ்நாடு தரவு உள்ளீட்டாளர்கள் சங்கம் அறிவித்துள்ளது.

இ-சேவை மையங்களில் பணிபுரியும் தரவு உள்ளீட்டாளர்களுக்குத் தொடர்ந்து முறையான ஊதியம் வழங்கப்படாமல் சம்பளப் பிடித்தம் செய்யப்படுவதாகவும், பி.எஃப் மற்றும் இ.எஸ்.ஐ போன்ற அத்தியாவசியப் பாதுகாப்புச் சலுகைகள் மறுக்கப்படுவதாகவும் குற்றச்சாட்டுகள் எழுந்துள்ளன. இதனைக் கண்டித்து, தங்களது நியாயமான கோரிக்கைகளை வலியுறுத்தி வரும் ஜூலை 20-ஆம் தேதி அன்று சென்னையில் மாபெரும் கவன ஈர்ப்பு உண்ணாவிரதப் போராட்டத்தை நடத்தத் தரவு உள்ளீட்டாளர்கள் சங்கம் முடிவு செய்துள்ளது.

இந்தத் தொடர் போராட்டத்தின் ஒரு பகுதியாக, ஜூலை 20 அன்று தமிழகம் முழுவதும் உள்ள அனைத்து அரசு இ-சேவை மையங்களும் தங்களது பணிகளை முற்றிலும் புறக்கணித்து மூடப்படவுள்ளன.

சாதிச் சான்றிதழ், வருமானச் சான்றிதழ், இருப்பிடச் சான்றிதழ், குடும்ப அட்டை சேவைகள் மற்றும் அரசுப் பள்ளிகள்/கல்லூரிகளுக்கான சேர்க்கை மையப் பணிகள் அன்றைய தினம் முழுமையாக முடங்கும் அபாயம் ஏற்பட்டுள்ளது.

இதனால், அன்றைய தினம் பொதுமக்கள் யாரும் இ-சேவை மையங்களின் சேவைகளைப் பெற இயலாது என்பதால், தங்களின் அத்தியாவசியத் தேவைகளை முன்கூட்டியே அல்லது அதற்கு அடுத்தடுத்த நாட்களில் பெற்றுக்கொள்ளுமாறு அறிவுறுத்தப்படுகிறார்கள்.

பொதுமக்களின் நலனைக் கருதி அரசு உடனடியாக இவர்களது கோரிக்கைகள் குறித்துப் பேச்சுவார்த்தை நடத்தி சுமுக தீர்வு காண வேண்டும் என்ற கோரிக்கையும் எழுந்துள்ளது.