"5 வருஷம் ஜெயில்ல போட்டாலும்... எந்த கொம்பனாலும்... " - விஜய்யை மீண்டும் சீண்டிய அனிதா ராதாகிருஷ்ணன்!

தமிழக முதலமைச்சரும், தவெக தலைவருமான விஜய்யை அவதூறாகப் பேசிய வழக்கில் கைது செய்யப்பட்டு, ஜாமீனில் வெளிவந்துள்ள திமுக முன்னாள் அமைச்சர் அனிதா ராதாகிருஷ்ணன், மீண்டும் விஜய்யைக் கடுமையாக விமர்சித்து அரசியல் களத்தில் பெரும் பரப்பை ஏற்படுத்தியுள்ளார். திமுக பொதுக்கூட்டம் ஒன்றில் கலந்து கொண்டு பேசிய அவர், தவெக மற்றும் காங்கிரஸ் கட்சிகளுக்குப் பகிரங்க சவால்களை விடுத்துள்ளார்.

சிறைவாசத்திற்குப் பிறகும் தனது விமர்சனக் கணைகளைக் குறைக்காத அனிதா ராதாகிருஷ்ணன், தவெக தலைவர் விஜய்யின் அன்றாட நடைமுறைகளை விமர்சிக்கும் தொனியில் தனது உரையைத் தொடங்கினார். "மாலை 6 மணிக்கு வீட்டுக்குச் சென்றால், காலை 10 மணிக்குத்  தான் எழும் பழக்கம் கொண்ட விஜய்க்கு, தமிழ்நாட்டில் என்ன நடக்கிறது என்பதே தெரியாது" என்று சாடினார்.

அரசியல் என்பது சினிமாவில் நடிப்பது போன்றது அல்ல என்று சுட்டிக்காட்டிய அவர், மக்களுக்கு எந்தவொரு நன்மையும் செய்யாமல் வெறும் சினிமாப் புகழை மட்டும் வைத்துக்கொண்டு மக்களை எளிதாக ஏமாற்றிவிடலாம் என்று சிலர் நினைப்பதாகக் குற்றம்சாட்டினார்.

தனது கைதின் பின்னணியில் ஆளும் தவெக தரப்பின் அரசியல் பழிவாங்கும் நடவடிக்கை இருப்பதாகக் குறிப்பிட்ட அனிதா ராதாகிருஷ்ணன், சிறை மிரட்டல்களுக்குத் தான் அஞ்சப்போவதில்லை என்று ஆவேசமாகப் பேசினார். "நான் மேடையில் பேசியதற்காக என் மீது புகார் அளித்து, என்னை ஒரு மாதம் சிறையில் வைக்கத் திட்டமிட்டார்கள். ஒரு மாதம் அல்ல, என்னை 5 ஆண்டுகள் சிறையில் அடைத்தாலும் திமுகவை எந்தவொரு கொம்பனாலும் அசைக்க முடியாது."

வரவிருக்கும் உள்ளாட்சித் தேர்தல் மற்றும் இடைத்தேர்தல்கள் குறித்துப் பேசிய அவர், எதிர்க்கட்சிகளுக்கு சவால் விடுத்துள்ளார். வரவிருக்கும் உள்ளாட்சித் தேர்தலில் காங்கிரஸ் கட்சியால் தமிழ்நாட்டில் ஒரு வார்டில் கூட வெல்ல முடியாது என்றும், அதேபோல் தவெக எங்கும் வென்றுவிட முடியாது என்றும் அவர் கூறினார்.

தேர்தல் களத்தில் அனைத்து இடங்களிலும் திமுகவே வென்றது என்ற புதிய வரலாற்றை உருவாக்க வேண்டிய பொறுப்பில் தற்போதைய தொண்டர்கள் இருக்கிறார்கள் என்று உறுதிபடத் தெரிவித்தார். மேலும், ஸ்ரீவைகுண்டம் தவெக எம்.எல்.ஏ எழுப்பிய 50 கோடி ரூபாய் புகார் குறித்தும், இடைத்தேர்தல் வியூகங்கள் குறித்தும் தனது உரையில் விளக்கமளித்த அனிதா ராதாகிருஷ்ணன், திமுகவின் பலத்தை யாராலும் குறைத்து மதிப்பிட முடியாது என்றார். ஜாமீனில் வெளிவந்த உடனே அனிதா ராதாகிருஷ்ணன் மேற்கொண்டுள்ள இந்த அதிரடித் தாக்குதல், தமிழக அரசியல் களத்தில் தவெக மற்றும் திமுக இடையேயான மோதல் போக்கை மேலும் தீவிரப்படுத்தியுள்ளது.