ரசிகர்கள் அதிர்ச்சி... பிரபல நடிகர் ஜேம்ஸ் ஹேண்டி குத்திக் கொலை!

ஹாலிவுட் திரையுலகில் ஐந்து தசாப்தங்களுக்கும் மேலாகப் புகழ்பெற்ற குணச்சித்திர நடிகராக வலம் வந்த 81 வயது மூத்த நடிகர் ஜேம்ஸ் ஹேண்டி, அவரது இல்லத்திலேயே மர்ம நபர்களால் மிகக் கொடூரமாகக் கத்தியால் குத்திக் கொலை செய்யப்பட்டுள்ளார்.

அமெரிக்காவின் கலிபோர்னியா மாகாணம் லாஸ் ஏஞ்சல்ஸ் நகரில் உள்ள தர்சானா என்ற பகுதியில் ஜேம்ஸ் ஹேண்டி வசித்து வந்தார். கடந்த புதன்கிழமை காலை, இவரது வீட்டின் முன்பிருந்து அவசரக் காவல் எண்ணான 911-க்கு ஒரு மர்மமான போன் அழைப்பு வந்துள்ளது.

அந்த அழைப்பில் பேசிய நபர், "நான் ஒரு பாவியைக் கொன்றுவிட்டேன்" என அதிர்ச்சியூட்டும் வாசகங்களைக் கூறிவிட்டு இணைப்பைத் துண்டித்துள்ளார். இதனால் பதறியடித்துக்கொண்டு சம்பவ இடத்திற்கு விரைந்து சென்ற லாஸ் ஏஞ்சல்ஸ் நகர போலீசார், ஜேம்ஸ் ஹேண்டியின் வீட்டுத் தோட்டத்தின் முன் முற்றத்தில் சோதனையிட்டனர்.

அப்போது, நடிகர் ஜேம்ஸ் ஹேண்டி மார்புப் பகுதியில் மிகக் கடுமையான கத்திக்குத்துக் காயங்களுடன், ரத்த வெள்ளத்தில் மயங்கிக் கிடப்பதைக் கண்டு போலீசார் அதிர்ச்சியடைந்தனர். உடனடியாக அவர் மீட்கப்பட்டு அருகில் உள்ள மருத்துவமனைக்குக் கொண்டு செல்லப்பட்டார். எனினும், அவர் ஏற்கனவே இறந்துவிட்டதாக மருத்துவர்கள் அதிகாரப்பூர்வமாக அறிவித்தனர்.

போலீசார் சம்பவ இடத்திற்கு வந்த சில நிமிடங்களிலேயே, அங்குப் பதுங்கியிருந்த 44 வயதான மைக்கேல் கிளெட்கில் என்ற நபர் போலீசாரை நோக்கி வந்து, தானே இந்தக் கொலையைச் செய்ததாகக் கூறி சரணடைந்தார்.

போலீசார் நடத்திய முதற்கட்ட விசாரணையில், கைது செய்யப்பட்டுள்ள மைக்கேல் கிளெட்கில், நடிகர் ஜேம்ஸ் ஹேண்டியின் காதலியின் மகன் என்பது தெரியவந்தது. அவரும் அவரது தாயாரும் ஜேம்ஸ் ஹேண்டியின் வீட்டிலேயே கடந்த சில காலமாக வசித்து வந்துள்ளனர். குடும்பத்தில் ஏற்பட்ட ஏதோ ஒரு கடுமையான வாக்குவாதம் மற்றும் விரோதம் காரணமாகவே, மைக்கேல் கிளெட்கில் ஆத்திரமடைந்து ஜேம்ஸ் ஹேண்டியைச் சரமாரியாகக் கத்தியால் குத்திக் கொலை செய்துள்ளார் என்பது அம்பலமாகியுள்ளது.  அவர் மீது கொலை வழக்குப் பதிவு செய்யப்பட்டு, 2 மில்லியன் டாலர் பிணைத் தொகையுடன் சிறையிலடைக்கப்பட்டுள்ளார்.

1970-களில் தனது தியேட்டர் மற்றும் சினிமா வாழ்க்கையைத் தொடங்கிய ஜேம்ஸ் ஹேண்டி, ஹாலிவுட்டின் மிகவும் மதிக்கப்படும் ஒரு சிறந்த குணச்சித்திர கலைஞராகக் கருதப்பட்டார்.

மறக்க முடியாத திரைப்படங்கள்: உலகப் புகழ்பெற்ற சாகசத் திரைப்படமான 'ஜுமான்ஜி' , அனிமேஷன் மற்றும் த்ரில்லர் கலந்த 'அராக்னோபோபியா' மற்றும் அண்மையில் வெளியாகி உலகளவில் வசூல் சாதனை படைத்த டாம் குரூஸின் 'டாப் கன்: மேவரிக்'  உள்ளிட்ட 150-க்கும் மேற்பட்ட பிரம்மாண்ட திரைப்படங்கள் மற்றும் தொலைக்காட்சித் தொடர்களில் மிகச் சிறந்த கதாபாத்திரங்களில் நடித்து ரசிகர்களின் மனதில் நீங்கா இடம் பிடித்தவர் ஆவார்.