“விவசாயக் கடன் தள்ளுபடி!” - உழவர் சந்தையில் சௌமியா அன்புமணி தீவிர வாக்கு சேகரிப்பு!

தமிழகச் சட்டமன்றத் தேர்தல் களத்தில் தேசிய ஜனநாயகக் கூட்டணியின் (NDA) முக்கிய அங்கமான பாட்டாளி மக்கள் கட்சி, தனது கோட்டையான தருமபுரியில் வெற்றியை உறுதி செய்ய அதிரடி வாக்குறுதிகளை அள்ளி வீசி வருகிறது.

தருமபுரி சட்டமன்றத் தொகுதியின் பாமக வேட்பாளர் சௌமியா அன்புமணி, இன்று (ஏப்ரல் 12) காலை முதல் தருமபுரி நகரப் பகுதிகளில் தீவிரமாக வாக்கு சேகரித்து வருகிறார். குறிப்பாக, இன்று அதிகாலை தருமபுரி உழவர் சந்தைக்குச் சென்ற அவர், அங்கிருந்த விவசாயிகள் மற்றும் பொதுமக்களை நேரில் சந்தித்து 'மாம்பழம்' சின்னத்திற்கு ஆதரவு திரட்டினார்.

பிரசாரத்தின் போது விவசாயிகள் மத்தியில் பேசிய சௌமியா அன்புமணி, "விவசாயிகளின் நலனே தேசிய ஜனநாயகக் கூட்டணியின் முதல் முன்னுரிமை. தமிழகத்தில் எங்கள் கூட்டணி ஆட்சி அமைந்தவுடன், கூட்டுறவு வங்கிகளில் விவசாயிகள் பெற்றுள்ள பயிர் கடன்கள் அனைத்தும் முற்றிலும் தள்ளுபடி செய்யப்படும். விவசாயிகளின் வாழ்வாதாரத்தை உயர்த்தப் பாமக எப்போதும் துணை நிற்கும்" என உறுதி அளித்தார்.

தருமபுரி தொகுதி பாமகவின் மிக முக்கியமான தொகுதியாகக் கருதப்படுவதால், அங்கு முகாமிட்டுள்ள சௌமியா அன்புமணி, ஒவ்வொரு தரப்பு மக்களையும் நேரடியாகச் சந்தித்து வருகிறார். குறிப்பாக, பெண்களுக்கு அதிகாரம் அளித்தல் மற்றும் தருமபுரி மாவட்டத்தின் நீர்நிலைத் திட்டங்களை நிறைவேற்றுவது குறித்த வாக்குறுதிகளையும் அவர் முன்வைத்து வருகிறார்.

தமிழகத்தில் பிரசாரம் முடிவடைய இன்னும் சில நாட்களே உள்ள நிலையில், சௌமியா அன்புமணியின் இந்த 'பயிர் கடன் தள்ளுபடி' அறிவிப்பு டெல்டா மற்றும் கொங்கு மண்டல விவசாயிகளிடையே கவனத்தை ஈர்த்துள்ளது.