FIFA WC: குராசோவை எளிதில் வீழ்த்திய ஐவரி கோஸ்ட் - முதன்முறையாக நாக்-அவுட் சுற்றுக்கு முன்னேறி சாதனை!

உலகக்கோப்பை கால்பந்து திருவிழாவின் குரூப் 'இ' பிரிவில் இன்று அதிகாலை நடைபெற்ற விறுவிறுப்பான லீக் ஆட்டத்தில், குராசோ அணியை 2-0 என்ற கோல் கணக்கில் வீழ்த்தி ஐவரி கோஸ்ட்  அணி அபார வெற்றி பெற்றது. இந்த வரலாற்று வெற்றியின் மூலம் ஐவரி கோஸ்ட் அணி முதன்முறையாக உலகக்கோப்பையின் நாக்-அவுட் சுற்றுக்குத் தகுதி பெற்றுள்ளது.

அமெரிக்காவின் பிலடெல்பியா மைதானத்தில் தொடங்கிய இந்த ஆட்டத்தில், ஆரம்பம் முதலே இரு அணி வீரர்களும் ஆக்ரோஷமான ஆட்டத்தை வெளிப்படுத்தினர்.

ஆட்டம் தொடங்கிய 7-ஆவது நிமிடத்திலேயே ஐவரி கோஸ்ட் அணி தனது முதல் கோலை பதிவு செய்தது. அந்த அணியின் யான் டியோமான்டெ நளினமாகக் கடத்திக் கொடுத்த பந்தை, நட்சத்திர வீரர் நிகோலஸ் பெபெ மிகத் துல்லியமாகக் கோலாக மாற்றி அசத்தினார். இதனால் ஐவரி கோஸ்ட் 1-0 என ஆரம்பத்திலேயே முன்னிலை பெற்றது.

இதன் பின்னர் ஆட்டத்தை சமன் செய்யக் குராசோ அணியினரும், முன்னிலையை அதிகரிக்க ஐவரி கோஸ்ட் அணியினரும் கடுமையாகப் போராடினர். எனினும் இரு அணியின் தடுப்பாட்ட அரண்களும் வலுவாக இருந்ததால் முதல் பாதி ஆட்ட நேர முடிவில் ஐவரி கோஸ்ட் 1-0 என்ற கணக்கில் முன்னிலையில் நீடித்தது. ஆட்டத்தின் இரண்டாவது பாதியில் குராசோ அணி கோல் அடிக்கப் பல உத்திகளைக் கையாண்ட போதும், ஐவரி கோஸ்ட் அணியின் பின்கள வீரர்கள் அதைச் சாதுர்யமாக முறியடித்தனர்.

ஆட்டத்தின் 64-ஆவது நிமிடத்தில் ஐவரி கோஸ்ட் அணியின் இப்ராகிம் சங்காரே  கொடுத்த அருமையான பாஸை, மீண்டும் ஒருமுறை நிகோலஸ் பெபெ மிக லாவகமாகக் கோல் வலையினுள் புகுத்தினார். இதன் மூலம் ஐவரி கோஸ்ட் அணி 2-0 என தனது நிலையை வலுப்படுத்திக் கொண்டது.

ஆட்டத்தின் இறுதி நிமிடங்கள் வரை மீண்டெழக் குராசோ அணி எடுத்த அனைத்து முயற்சிகளும் தோல்வியிலேயே முடிந்தன. நடுவரின் இறுதி விசிலுக்குப் பின், ஐவரி கோஸ்ட் அணி 2-0 என்ற கணக்கில் அதிகாரப்பூர்வமாக வெற்றியைத் தன்வசப்படுத்தியது.

இந்த அசத்தல் வெற்றியின் மூலம், தனது உலகக்கோப்பை கால்பந்து வரலாற்றுப் பயணத்தில் முதன்முறையாக நாக்-அவுட் சுற்றுக்கு முன்னேறி ஐவரி கோஸ்ட் அணி புதிய சாதனை படைத்துள்ளது. இதனால் அந்த நாட்டு ரசிகர்களும் வீரர்களும் மைதானத்தில் பெரும் கொண்டாட்டத்தில் ஈடுபட்டு வருகின்றனர்.