இறைச்சி கழிவுகள் கொட்டப்படுவதால் காக்களூர் ஏரியில் செத்து மிதக்கும் மீன்கள்!

திருவள்ளூர் நகரின் மையப்பகுதியில் 194 ஏக்கர் பரப்பளவில் அமைந்துள்ள வரலாற்றுச் சிறப்புமிக்கக் காக்களூர் ஏரி கடுமையான சுற்றுச்சூழல் மாசடைவைச் சந்தித்து வருகிறது. திருவள்ளூர் நகராட்சி மற்றும் காக்களூர் ஊராட்சியில் உள்ள பல்வேறு இறைச்சிக் கடைகளிலிருந்து தினந்தோறும் வெளியேற்றப்படும் டன் கணக்கிலான இறைச்சிக் கழிவுகளைச் சமூக விரோதிகள் சிலர் நள்ளிரவு நேரங்களில் இந்த ஏரித் தண்ணீரில் கொண்டு வந்து கொட்டுகின்றனர். மேலும், அருகில் உள்ள தமிழ்நாடு வீட்டு வசதி வாரியக் குடியிருப்புப் பகுதிகளில் இருந்து போதிய வடிகால் வசதி இல்லாததால், அங்குள்ள நச்சுத்தன்மை வாய்ந்த வீட்டுக் கழிவுநீரும் ஏரிக்குள் நேரடியாகக் கலந்து நீரை முழுமையாக மாற்றி வருகிறது.

சமீபத்தில் ஏரியின் ஒரு பகுதியில் புதிய கரை அமைக்கும் பணிகளுக்காக ஏரியில் தேங்கியிருந்த தண்ணீர் மதகுகள் வழியாக அசுர வேகத்தில் வெளியேற்றப்பட்டு வருகிறது. இதனால் ஏரியின் நீர்மட்டம் கணிசமாகக் குறைந்துள்ள நிலையில், இறைச்சிக் கழிவுகள் மற்றும் நச்சுக் கழிவுநீர் கலப்பால் ஏரித் தண்ணீர் முழுமையாகத் தன் தூய்மையை இழந்துள்ளது. இந்தத் தீவிரக் காற்று மற்றும் நீர் மாசு காரணமாக ஏரியில் உள்ள ஆயிரக்கணக்கான மீன்கள் மூச்சுத்திணறிச் செத்து, சுமார் 1 கிலோமீட்டர் தூரத்திற்குக் கரையோரப் பகுதிகளில் குவியலாக மிதக்கத் தொடங்கியுள்ளன.

ஏரியில் மீன்கள் செத்து அழுகி வருவதால் அந்தப் பகுதி முழுவதும்   கடுமையான துர்நாற்றம் வீசி நரகமாக மாறியுள்ளது. 'நமக்கு நாமே' திட்டத்தின் கீழ் 2.51 கோடி ரூபாய் மதிப்பில் அமைக்கப்பட்ட பூங்கா மற்றும் நடைபாதைக்கு அதிகாலை நேரத்தில் நடைபயிற்சிக்கு வரும் 2 லட்சத்திற்கும் மேற்பட்ட பொதுமக்களுக்கு இதன் காரணமாகச் சுவாசக் கோளாறுகள் ஏற்படும் அபாயம் உருவாகியுள்ளது. காக்களூர் ஏரியைப் பாதுகாக்கவும், கழிவுநீர் மற்றும் இறைச்சிக் கழிவுகள் கலப்பதைத் தடுக்கவும் மாவட்ட கலெக்டர் உடனடியாகப் போர்க்கால அடிப்படையில் கடுமையான நடவடிக்கை எடுக்க வேண்டும் என உள்ளூர் சமூக ஆர்வலர்கள் தங்களின் கோரிக்கையை  முன்வைத்துள்ளனர்.