நாளையுடன் மீன்பிடித் தடைக்காலம் நிறைவு.. 61 நாட்களுக்குப் பிறகு கடலுக்குச் செல்லத் தயாராகும் மீனவர்கள்!

தமிழகத்தின் கிழக்குக் கடற்கரைப் பகுதிகளில் ஆண்டுதோறும் நடைமுறையில் இருக்கும் மீன்பிடித் தடைக்காலம் நாளை நள்ளிரவுடன் நிறைவடைவதைத் தொடர்ந்து, மீனவர்கள் மீண்டும் ஆழ்கடலுக்குச் செல்ல ஆவலுடன் தயாராகி வருகின்றனர்.

கடல்வளத்தைப் பாதுகாக்கவும், மீன்களின் இனப்பெருக்கக் காலத்தைக் கருத்தில் கொண்டும் தமிழகத்தின் கிழக்குக் கடற்கரை பகுதிகளில் ஆண்டுதோறும் 61 நாட்கள் மீன்பிடித் தடைக்காலம் அமல்படுத்தப்படுவது வழக்கம். அந்த வகையில், நடப்பாண்டிற்கான தடைக்காலம் கடந்த ஏப்ரல் மாதம் 15-ஆம் தேதி நள்ளிரவு முதல் தொடங்கி நடைமுறையில் இருந்து வந்தது. இந்த தடைக்காலத்தின் போது விசைப்படகுகள் மற்றும் இழுவைப்படகுகள் மூலம் ஆழ்கடலுக்குச் சென்று மீன்பிடிக்க மீனவர்களுக்குக் கடுமையான தடை விதிக்கப்பட்டிருந்தது.

இந்த 61 நாட்கள் தடைக்காலத்தின் காரணமாகத் தூத்துக்குடி, வேம்பார், தருவைகுளம் மற்றும் ராமநாதபுரம், நாகப்பட்டினம், சென்னை உள்ளிட்ட தமிழகத்தின் பல்வேறு கடலோரப் பகுதிகளில் உள்ள ஆயிரக்கணக்கான விசைப்படகுகள் கரைகளில் பாதுகாப்பாக நிறுத்தி வைக்கப்பட்டிருந்தன. தூத்துக்குடி மாவட்டத்தில் மட்டுமே சுமார் 545-க்கும் மேற்பட்ட விசைப்படகுகள் கரைகளில் முடங்கியிருந்தன. இந்த நீண்ட ஓய்வு நேரத்தில் மீனவர்கள் தங்களது படகுகளைப் பழுதுபார்ப்பது, வண்ணம் தீட்டுவது மற்றும் மீன்பிடி வலைகளைச் சீரமைப்பது போன்ற பராமரிப்புப் பணிகளில் தீவிரமாக ஈடுபட்டு வந்தனர்.

தற்போது மீன்பிடித் தடைக்காலம் நாளை ஜூன் 15-ஆம் தேதியுடன் முழுமையாக நிறைவடைவதால், கிழக்குக் கடற்கரை மாவட்டங்களைச் சேர்ந்த பல்லாயிரக்கணக்கான விசைப்படகு மீனவர்கள் தங்களின் வாழ்வாதாரத் தொழிலைத் தொடங்க உற்சாகமடைந்துள்ளனர். கடலுக்குச் செல்வதற்குத் தேவையான டீசல், ஐஸ் கட்டிகள் மற்றும் உணவுப் பொருட்களைப் படகுகளில் ஏற்றும் பணிகளில் மீனவர்கள் தற்போது மிகத் தீவிரமாக ஈடுபட்டு வருகின்றனர்.

நாளை நள்ளிரவு முதல் விசைப்படகுகள் அனைத்தும் கடலுக்குள் செல்ல அனுமதி அளிக்கப்பட உள்ளதால், நீண்ட இடைவெளிக்குப் பிறகு சந்தைகளுக்குக் கூடுதல் எண்ணிக்கையில் மீன்கள் வரத்தொடங்கும் என்றும், இதனால் மீன்களின் விலை கணிசமாகக் குறையும் என்றும் எதிர்பார்க்கப்படுகிறது.