மணிமுத்தாறு அருவியில் வெள்ளப்பெருக்கு... சுற்றுலா பயணிகள் குளிக்க அதிரடித் தடை!

நெல்லை மாவட்டம் அம்பை அருகே மேற்குத் தொடர்ச்சி மலை அடிவாரத்தில் உள்ள மணிமுத்தாறு அருவி, சுற்றுலா பயணிகளின் விருப்பமான இடமாகும். இந்நிலையில், மலைப்பகுதிகள் மற்றும் நீர்ப்பிடிப்பு பகுதிகளில் நேற்று இரவு பெய்த கனமழை காரணமாக அருவிக்கு வரும் நீரின் அளவு பெருமளவில் அதிகரித்துள்ளது. இதனால் அருவியில் வெள்ளப்பெருக்கு ஏற்பட்டுள்ளதால், பாதுகாப்பு கருதி சுற்றுலா பயணிகள் குளிக்க வனத்துறை தற்போது தடை விதித்துள்ளது.

ஆண்டு முழுவதும் தண்ணீர் விழும் இந்த அருவியில் குளிக்கத் தடை விதிக்கப்பட்டுள்ளதால், தூர ஊர்களில் இருந்து வந்த சுற்றுலா பயணிகள் கடும் ஏமாற்றம் அடைந்துள்ளனர். இருப்பினும், வெள்ளத்தின் வேகம் அதிகமாக இருப்பதால் எவ்வித அசம்பாவிதமும் நடைபெறாமல் இருக்க இந்த முன்னெச்சரிக்கை நடவடிக்கை எடுக்கப்பட்டுள்ளது. அருவியில் குளிக்க அனுமதி இல்லையென்றாலும், தூரத்தில் இருந்து அருவியைப் பார்வையிட மட்டும் வனத்துறையினர் அனுமதி வழங்கியுள்ளனர்.

தற்போது கோடைக்காலம் என்பதால் அருவிக்கு வரும் சுற்றுலா பயணிகளின் எண்ணிக்கை அதிகமாக உள்ள நிலையில், இந்தத் தடை உத்தரவு பிறப்பிக்கப்பட்டுள்ளது. நீரோட்டம் சீரான பிறகு மீண்டும் பயணிகள் குளிக்க அனுமதி வழங்கப்படும் எனத் தெரிகிறது. அதுவரை வனத்துறையினரின் கட்டுப்பாடுகளை மதித்துச் சுற்றுலா பயணிகள் ஒத்துழைப்பு வழங்க வேண்டும் எனக் கேட்டுக்கொள்ளப்பட்டுள்ளது.