இன்று இறுதிசடங்குகள்... பிரபல நடிகர் பிப்லாப் தாஸ்குப்தா காலமானார் - திரையுலகினர் நேரில் அஞ்சலி!

பெங்காலி திரையுலகின் மூத்த நடிகரும், ரசிகர்களால் பெரிதும் மதிக்கப்பட்டவருமான பிப்லாப் தாஸ்குப்தா (75), உடல்நலக்குறைவு காரணமாக நேற்று காலமானார். கடந்த சில நாட்களாக அறுவை சிகிச்சைக்குப் பிந்தைய உடல்நலச் சிக்கல்களால் அவதிப்பட்டு வந்த அவர், நேற்று நிலைமை மோசமடைந்ததையடுத்து உடனடியாக மருத்துவமனைக்குக் கொண்டு செல்லப்பட்டார். ஆனால், துரதிர்ஷ்டவசமாக மருத்துவமனைக்குச் செல்லும் வழியிலேயே அவரது உயிர் பிரிந்ததாக மருத்துவர்கள் தெரிவித்துள்ளனர். இந்தத் திடீர் மறைவு பெங்காலி திரையுலகினர் மற்றும் ரசிகர்கள் மத்தியில் பெரும் அதிர்ச்சியையும் சோகத்தையும் ஏற்படுத்தியுள்ளது.

பிப்லாப் தாஸ்குப்தா தனது அசாத்தியமான நடிப்பால் பல தசாப்தங்களாகத் திரையுலகில் முத்திரை பதித்தவர். குறிப்பாக, விமர்சன ரீதியாகப் பாராட்டப்பட்ட ‘பைஷே ஸ்ரவன்’ மற்றும் ‘கும்நமி’  போன்ற மாபெரும் வெற்றித் திரைப்படங்களில் இவரது நடிப்பு அனைவராலும் பேசப்பட்டது.

வெள்ளித்திரை மட்டுமல்லாமல், சின்னத்திரையிலும் பல சூப்பர் ஹிட் தொலைக்காட்சித் தொடர்களில் முக்கியமான கதாபாத்திரங்களில் நடித்துத் தனி முத்திரை பதித்தவர். இவரது கம்பீரமான குரலும், யதார்த்தமான நடிப்புமே இவரை மற்ற நடிகர்களிடம் இருந்து தனித்துக் காட்டியது.

அவரது மறைவுச் செய்தி வெளியானதிலிருந்து, மேற்கு வங்க முதலமைச்சர் உள்ளிட்ட அரசியல் தலைவர்கள், திரையுலகப் பிரபலங்கள் மற்றும் தொலைக்காட்சித் துறை சார்ந்த பலரும் சமூக வலைத்தளங்கள் வாயிலாகத் தங்களது ஆழ்ந்த இரங்கலைத் தெரிவித்து வருகின்றனர்.

“ஒரு சிறந்த கலைஞனைத் திரையுலகம் இழந்துவிட்டது” என்று சக நடிகர்கள் கண்ணீர் மல்கக் கூறி வருகின்றனர். 75 வயதில் மறைந்த பிப்லாப் தாஸ்குப்தாவின் இறுதிச் சடங்குகள் இன்று நடைபெற உள்ள நிலையில், அவரது ரசிகர்கள் மற்றும் திரையுலகினர் அவருக்கு நேரில் அஞ்சலி செலுத்தி வருகின்றனர். பெங்காலி சினிமாவின் ஒரு பொற்காலம் அவரோடு முடிவுக்கு வந்திருப்பதாகத் திரை விமர்சகர்கள் வேதனையுடன் தெரிவித்துள்ளனர்.