ஜெம் வீரமணி போக்சோ வழக்கில் இன்று நேரில் ஆஜர்!

ஜெம் கிரானைட்ஸ் நிறுவனத்தின் உரிமையாளர் வீரமணி மீது மேலும் 2 பேர் புகார் அளித்துள்ள நிலையில், அந்த புகார்களின் அடிப்படையில் பதிவு செய்யப்பட்ட வழக்கில் அவர் சென்னை போக்சோ சிறப்பு நீதிமன்றத்தில் இன்று நேரில் ஆஜர்படுத்தப்பட்டார்.சிறுமிகளுக்கு பாலியல் தொல்லை அளித்ததாக வீரமணி மீது ஏற்கெனவே பல்வேறு புகார்கள் மற்றும் வழக்குகள் பதிவு செய்யப்பட்டுள்ளன. இந்த வழக்குகளை விசாரிக்க சிறப்பு புலனாய்வுக் குழு அமைக்கப்பட்டு விசாரணை நடைபெற்று வருகிறது.

இந்த நிலையில், சிறப்பு புலனாய்வுக் குழுவுக்கு தொடர்ந்து புதிய புகார்கள் வந்ததாக போலீசார் தெரிவித்துள்ளனர். தற்போது மேலும் 2 பேர் அளித்த புகார்களின் அடிப்படையில் வீரமணி மீது புதிய வழக்குகள் பதிவு செய்யப்பட்டுள்ளன.

இதையடுத்து விசாரணைக்காக வீரமணியை சென்னை போக்சோ சிறப்பு நீதிமன்றத்தில் போலீசார் ஆஜர்படுத்தினர். முந்தைய விசாரணையின்போது அவர் காணொலி காட்சி மூலம் நீதிமன்றத்தில் ஆஜர்படுத்தப்பட்டிருந்த நிலையில், இந்த முறை நேரில் ஆஜர்படுத்தப்பட்டுள்ளார்.வீரமணி கடந்த ஆகஸ்ட் 29-ம் தேதி போக்சோ சட்டத்தின் கீழ் கைது செய்யப்பட்டு புழல் மத்திய சிறையில் அடைக்கப்பட்டுள்ளார். அவரது நீதிமன்றக் காவல் அக்டோபர் 9-ம் தேதி வரை ஏற்கெனவே நீட்டிக்கப்பட்டுள்ளது.

இதற்கிடையே, வீரமணிக்கு உடந்தையாக இருந்ததாக சந்தேகிக்கப்படும் அவரது முன்னாள் கார் ஓட்டுநர்கள் லாசர், பார்த்திபன், பாபு ஆகிய 3 பேரை சிறப்பு புலனாய்வுக் குழு கடந்த அக்டோபர் 5-ம் தேதி கைது செய்தது. அவர்களது வீடுகளில் நடத்தப்பட்ட சோதனையில் 8 செல்போன்கள் மற்றும் 55 ஆவணங்கள் கைப்பற்றப்பட்டதாக போலீசார் தெரிவித்துள்ளனர்.வீரமணி தொடர்பான வழக்குகளில் தொடர்ந்து விசாரணை நடைபெற்று வரும் நிலையில், புதிய புகார்களின் அடிப்படையில் மேற்கொள்ளப்படும் விசாரணையும் முக்கியத்துவம் பெற்றுள்ளது.