சிறுமி பாலியல் கொலை வழக்கு... குற்றவாளிக்கு மரண தண்டனை விதித்து நீதிமன்றம் அதிரடி தீர்ப்பு!

புதுச்சேரியில் கடந்த 2024 ஆம் ஆண்டு 9 வயது சிறுமி கடத்தப்பட்டு, பாலியல் வன்கொடுமை செய்யப்பட்டு கொல்லப்பட்ட கொடூர வழக்கில் நீதிமன்றம் தற்போது இறுதித் தீர்ப்பை வழங்கியுள்ளது. இந்த வழக்கில் கைதான 19 வயது இளைஞன் கருணாஸ் என்பவருக்கு மரண தண்டனை விதித்து நீதிபதி அதிரடியாக உத்தரவிட்டார். இதே வழக்கில் கைதான மற்றொரு நபரான 59 வயது விவேகானந்தன் என்பவர், கடந்த ஆண்டே சிறையில் தற்கொலை செய்து கொண்டது குறிப்பிடத்தக்கது.

இந்தக் கொடூரமான குற்றத்தைச் செய்த கருணாஸுக்கு மரண தண்டனை வழங்கப்பட்டதோடு, பாதிக்கப்பட்ட சிறுமியின் குடும்பத்திற்கு 10 லட்சம் ரூபாய் இழப்பீடு வழங்க வேண்டும் எனவும் அரசுக்கு நீதிமன்றம் உத்தரவிட்டுள்ளது. பிஞ்சுச் சிறுமிக்கு நேர்ந்த இந்தத் துயரச் சம்பவம் புதுச்சேரி மக்களிடையே பெரும் கொந்தளிப்பை ஏற்படுத்தியிருந்தது. தற்போது வழங்கப்பட்டுள்ள இந்தத் தீர்ப்பானது சமூகத்தில் குற்றவாளிகளுக்கு ஒரு பாடமாக அமையும் எனப் பொதுமக்கள் மற்றும் சமூக ஆர்வலர்கள் வரவேற்பு தெரிவித்துள்ளனர்.

நீண்ட நாட்களாக நடைபெற்று வந்த இந்த வழக்கின் விசாரணை முடிவில், குற்றவாளி மீதான குற்றச்சாட்டுகள் ஆதாரங்களுடன் நிரூபிக்கப்பட்டதால் இந்த உச்சகட்டத் தண்டனை அறிவிக்கப்பட்டுள்ளது. சிறுமிகளுக்கு எதிரான வன்கொடுமைகளில் ஈடுபடுபவர்களுக்கு இத்தகைய கடுமையான தண்டனைகள் வழங்கப்படுவதே நீதியை நிலைநாட்டும் எனப் பாதிக்கப்பட்ட குடும்பத்தினர் கண்ணீருடன் தெரிவித்தனர். இந்தத் தீர்ப்பு வெளியானதைத் தொடர்ந்து நீதிமன்ற வளாகத்தில் பலத்த போலீஸ் பாதுகாப்பு போடப்பட்டிருந்தது.