அரசு பேருந்து கட்டுப்பாட்டை இழந்து பள்ளத்தில் கவிழ்ந்து விபத்து; சிறுவன் உட்பட 15 பேர் படுகாயம்!

சிவகங்கை மாவட்டம் திருப்புவனம் அருகே, மதுரையிலிருந்து ராமேஸ்வரம் நோக்கிச் சென்று கொண்டிருந்த அரசுப் பேருந்து திடீரென ஓட்டுநரின் கட்டுப்பாட்டை இழந்து சாலையோரப் பள்ளத்தில் பாய்ந்து விபத்துக்குள்ளானதில், ஒரு சிறுவன் உட்பட 15 பயணிகள் படுகாயமடைந்தனர்.

மதுரை எம்.ஜி.ஆர் பேருந்து நிலையத்திலிருந்து நேற்று மாலை பயணிகளுடன் அரசுப் பேருந்து ஒன்று ராமேஸ்வரம் நோக்கிப் புறப்பட்டது. அந்தப் பேருந்து நேற்று மாலை 6.30 மணியளவில் சிவகங்கை மாவட்டம், திருப்புவனம் அருகே உள்ள நரிக்குடி பிரிவுப் பகுதி வழியே சென்று கொண்டிருந்தது.

அப்போது, எதிர்பாராத விதமாக ஓட்டுநரின் கட்டுப்பாட்டை இழந்த அரசுப் பேருந்து, தறிகெட்டு ஓடிச் சாலையோரம் இருந்த ஆழமான பள்ளத்தில் பாய்ந்து சரிந்தது. பேருந்து பள்ளத்தில் இறங்கிய வேகத்தில் உள்ளே இருந்த பயணிகள் அனைவரும் தூக்கி வீசப்பட்டு அலறினர். விபத்தின் சத்தம் கேட்டு ஓடிவந்த அந்தப் பகுதி மக்கள் மற்றும் அவ்வழியே சென்ற வாகன ஓட்டிகள் உடனடியாக மீட்புப் பணியில் இறங்கினர்.

இந்தக் கோர விபத்தில் பேருந்திற்குள் பயணம் செய்த ஒரு சிறுவன் உட்பட மொத்தம் 15 பயணிகள் உடல் நசுங்கியும், பலத்த காயங்களுடனும் மீட்கப்பட்டனர். விபத்து குறித்துத் தகவலறிந்து சம்பவ இடத்திற்கு விரைந்து வந்த திருப்புவனம் போலீசார் மற்றும் 108 ஆம்புலன்ஸ் குழுவினர், காயமடைந்தவர்களை மீட்டு சிகிச்சைக்காகத் திருப்புவனம் அரசு மருத்துவமனைக்கு அனுப்பி வைத்தனர்.

அங்கு அவர்களுக்குத் தீவிர சிகிச்சை அளிக்கப்பட்டு வரும் நிலையில், தலையில் பலத்த காயமடைந்து உயிருக்கு ஆபத்தான நிலையில் இருந்த மூன்று பயணிகள் மேல் சிகிச்சைக்காக உடனடியாக மதுரை அரசு ராஜாஜி மருத்துவமனைக்கு  மாற்றப்பட்டனர். அங்கு அவர்களுக்கு அவசரச் சிகிச்சைப் பிரிவில் தீவிரக் கண்காணிப்பில் சிகிச்சை அளிக்கப்பட்டு வருகிறது.

விபத்து நடந்த பகுதியில் சிறிது நேரம் போக்குவரத்துப் பாதிப்பு ஏற்பட்டது. கிரேன் உதவியுடன் பள்ளத்தில் கிடந்த அரசுப் பேருந்து மீட்கப்பட்ட பின் போக்குவரத்துச் சீரானது. இந்த விபத்து ஓட்டுநரின் தூக்கக் கலக்கத்தால் ஏற்பட்டதா அல்லது பேருந்தில் ஏதேனும் தொழில்நுட்பக் கோளாறு காரணமா என்ற கோணத்தில் திருப்புவனம் போலீசார் வழக்குப் பதிவு செய்து தீவிர விசாரணை நடத்தி வருகின்றனர்.