அவலம்... விளக்கு எரியாமல் இருட்டில் நத்தை போல் ஊர்ந்து சென்ற அரசுப் பேருந்து... !

சிவகங்கை மாவட்டம் சிங்கம்புணரியில் இருந்து திருப்பத்தூர் நோக்கி நேற்று முன்தினம் இரவு புறப்பட்ட அரசுப் பேருந்து, முகப்பு விளக்குகள் எரியாத காரணத்தால் மிகுந்த சிரமத்திற்கு உள்ளானது. போதிய வெளிச்சம் இல்லாததால், ஓட்டுநர் பேருந்தை மிகவும் மெதுவாகவும், கவனமாகவும் இயக்கி திருப்பத்தூரை அடைந்தார். இரவு நேரப் பயணம் என்பதால், பேருந்துக்குள் இருந்த பயணிகள் அச்சத்துடன் தங்கள் பயணத்தை மேற்கொண்டது பெரும் அதிருப்தியை ஏற்படுத்தியுள்ளது.

திருப்பத்தூர், மேலூர் மற்றும் நத்தம் ஆகிய பணிமனைகளில் இருந்து இயக்கப்படும் பல அரசுப் பேருந்துகள் மிகவும் மோசமான நிலையில் இருப்பதாகப் பயணிகள் தொடர்ந்து குற்றம் சாட்டி வருகின்றனர். மழைக் காலங்களில் பேருந்துக்குள் தண்ணீர் ஒழுகுவதும், இருக்கைகள் பழுதடைந்து இருப்பதும், முக்கியமாக இரவு நேரத்திற்குத் தேவையான முகப்பு விளக்குகள் கூட சரியாக எரியாமல் இருப்பதும் வாடிக்கையாகிவிட்டது. இது போன்ற பழுதடைந்த பேருந்துகளை இயக்குவது பயணிகளின் பாதுகாப்பிற்குப் பெரும் அச்சுறுத்தலாக அமைகிறது.

பொதுமக்களின் அன்றாடப் போக்குவரத்திற்கு ஆதாரமாக விளங்கும் அரசுப் பேருந்துகள், முறையான பராமரிப்பின்றி இயக்கப்படுவது கண்டிக்கத்தக்கது என்று சமூக ஆர்வலர்கள் சுட்டிக்காட்டுகின்றனர். போக்குவரத்துத்துறை அதிகாரிகள் உடனடியாகத் தலையிட்டு, பழுதடைந்த பேருந்துகளைச் சீரமைக்க வேண்டும் அல்லது புதிய பேருந்துகளை இயக்க நடவடிக்கை எடுக்க வேண்டும். பயணிகளின் பாதுகாப்பான பயணத்தை உறுதி செய்வது அரசின் கடமையாகும் என்பதை உணர்ந்து சம்பந்தப்பட்ட துறையினர் விரைந்து செயல்பட வேண்டும் எனப் பொதுமக்கள் கோரிக்கை விடுத்துள்ளனர்.