தனியார் கல்லூரிகளில் துணை மருத்துவப் படிப்புகளுக்கான புதிய கட்டணங்களை நிர்ணயித்து அரசு அறிவிப்பு!

தமிழகத்தில் நடுத்தர வர்க்க மாணவர்களின் மருத்துவக் கல்விக் கனவை நனவாக்கும் வகையிலான ஒரு மிக முக்கியப் புதிய மைல்கல் திட்டத்தைத் தமிழக அரசு  நடைமுறைப்படுத்தியுள்ளது.

தமிழகத்தில் உள்ள தனியார் சுயநிதி மருத்துவக் கல்லூரிகள் மற்றும் கல்வி நிறுவனங்களில் பயிற்றுவிக்கப்படும் பல்வேறு துணை மருத்துவப் படிப்புகளுக்கு, கல்வித் கட்டண நிர்ணயக் குழுவின் பரிந்துரையின் பேரில் வரலாற்றிலேயே முதன்முறையாகத் தமிழக அரசு முறைப்படியான புதிய கட்டண அமைப்பை நிர்ணயம் செய்து அரசாணை வெளியிட்டுள்ளது.

முன்னதாகத் தனியார் கல்லூரிகள் தங்களுக்குத் தோன்றியவாறு பல்லாயிரக்கணக்கில் கட்டணங்களை வசூலித்து வந்த நிலையில், நர்சிங் மற்றும் பட்டயப் படிப்புகளுக்கான கட்டண வரம்பு முறைப்படுத்தப்பட்டுள்ளது.

டிப்ளமோ நர்சிங் இப்பாடப் பிரிவிற்கு அரசு ஒதுக்கீட்டு இடங்களின் கீழ் சேரும் மாணவர்களுக்கு ஆண்டுக்கு ₹35,000 கட்டணமாக நிர்ணயிக்கப்பட்டுள்ளது. அதே நேரத்தில், நிர்வாக ஒதுக்கீட்டு இடங்களின் கீழ் சேரும் மாணவர்களுக்கு ஆண்டுக்கு ₹75,000 கட்டணமாக வரம்பு நிர்ணயம் செய்யப்பட்டுள்ளது.

துணை செவிலியர் மகப்பேறு பட்டயப் படிப்புக்கு அரசு ஒதுக்கீட்டில் ₹30,000 மற்றும் நிர்வாக ஒதுக்கீட்டில் ₹60,000 புதிய கட்டணமாக அறிவிக்கப்பட்டுள்ளது. டிப்ளமோ பார்மசி  பாடநெறிக்கு அரசு ஒதுக்கீட்டில் ₹25,000 மற்றும் நிர்வாக ஒதுக்கீட்டு இடங்களுக்கு ஆண்டுக்கு ₹50,000 என நிர்ணயம் செய்யப்பட்டுள்ளது.

டிப்ளமோ படிப்புகள் மட்டுமின்றி, பி.எஸ்சி நர்சிங் உள்ளிட்ட 4 ஆண்டுகால இளநிலை பட்டப் படிப்புகளுக்கான அதிகாரப்பூர்வ கட்டண விபரங்களையும் தமிழக அரசு வெளியிட்டுள்ளது. பி.எஸ்சி நர்சிங் & போஸ்ட் பி.எஸ்சி நர்சிங் பாட திட்டத்திற்கு அரசு ஒதுக்கீட்டுப் பிரிவில் ஆண்டுக்கு ₹60,000 மற்றும் நிர்வாக ஒதுக்கீட்டுப் பிரிவில் ₹1.20 லட்சம் கட்டணமாக நிர்ணயிக்கப்பட்டுள்ளது.

பி.பார்ம், பி.பி.டி., தொழில்முறை சிகிச்சை மற்றும் இளநிலை அலைடு ஹெல்த் சயின்ஸ் படிப்புகளுக்கு அரசு ஒதுக்கீட்டுத் தொகையாக ஆண்டுக்கு ₹50,000 மற்றும் நிர்வாக ஒதுக்கீட்டுத் தொகையாக ₹1 லட்சம் புதிய கட்டணமாக அமலுக்கு வந்துள்ளது.

அடுத்த மூன்று கல்வி ஆண்டுகளுக்கும் இதே சீரான அரசு மற்றும் நிர்வாக ஒதுக்கீட்டுக் கட்டண விவரங்கள் பொருந்தும் எனத் தமிழக அரசு தெளிவுபடுத்தியுள்ளது. மேலும், இக்கல்வி ஆண்டிற்கான துணை மருத்துவப் படிப்புகளில் சேருவதற்கு விண்ணப்பிப்பதற்கான கால அவகாசம்  ஜூலை 7-ஆம் தேதி வரை நீட்டிக்கப்பட்டுள்ளதாகவும் தேர்வு முகமை அறிவித்துள்ளது.

தனியார் மருத்துவக் கல்லூரிகளில் எம்பிபிஎஸ் மற்றும் பிடிஎஸ் படிப்புகளுக்கு அரசு நிர்ணயித்த கட்டணத்தைக் காட்டிலும் கூடுதலாக வசூலித்த 5 முன்னணித் தனியார் கல்லூரிகள் மீது விசாரணை நடத்த மருத்துவக் கல்வி இயக்ககம்  ஆய்வுக்குழு அமைத்துள்ள சூழலில், நடுத்தர மாணவர்களின் நலன் கருதித் துணை மருத்துவப் படிப்புகளுக்கும் இந்த ஆண்டு முதல் புதிய கட்டண வரம்பு கொண்டு வரப்பட்டிருப்பது ஏழை மாணவர்களிடையே பெரும் வரவேற்பைப் பெற்றுள்ளது.