ஹர்பஜன் சிங் வீட்டு சுவரில் 'துரோகி' என எழுதிய தொண்டர்கள்: பஞ்சாபில் பரபரப்பு!
பஞ்சாப் மாநில ஆம் ஆத்மி கட்சியில் நிலவி வந்த உள்கட்சிப் பூசல் காரணமாக மாநிலங்களவை உறுப்பினர் ராகவ் சத்தா திடீரென பாஜகவில் இணைந்தார். அவருடன் முன்னாள் கிரிக்கெட் வீரர் ஹர்பஜன் சிங் உள்ளிட்ட 7 நாடாளுமன்ற உறுப்பினர்கள் பாஜகவில் தங்களை இணைத்துக் கொண்டது பெரும் பரபரப்பை ஏற்படுத்தியுள்ளது. தங்களை விட்டு விலகிச் சென்ற இந்த 7 பேரையும் துரோகிகள் என்று பஞ்சாப் முதல்வர் பகவந்த் மான் கடுமையாகச் சாடியுள்ளார். இந்தத் திடீர் அரசியல் மாற்றத்தால் பஞ்சாப் மாநில அரசியலில் பெரும் குழப்பமும் கொந்தளிப்பான சூழலும் நிலவி வருகிறது.
பாஜகவில் இணைந்த மறுநாளே ஜலந்தரில் உள்ள ஹர்பஜன் சிங்கின் வீட்டை ஆம் ஆத்மி கட்சியினர் முற்றுகையிட்டு அதிரடி போராட்டத்தில் ஈடுபட்டனர். ஆத்திரமடைந்த தொண்டர்கள் ஹர்பஜன் சிங் வீட்டின் சுவர்களில் கறுப்பு மையால் துரோகி என்கிற வாசகத்தை எழுதித் தங்கள் எதிர்ப்பைப் பதிவு செய்தனர். மேலும் பல தொண்டர்கள் தங்கள் கண்களில் கறுப்புத் துணிகளைக் கட்டிக்கொண்டு வீட்டின் முன்பாக அமர்ந்து தர்ணா போராட்டத்தில் ஈடுபட்டனர். இந்தச் சம்பவத்தால் அந்தப் பகுதியில் பெரும் பதற்றம் நிலவியதுடன் பாதுகாப்புப் பணியில் ஏராளமான காவல்துறையினர் குவிக்கப்பட்டனர்.
போராட்டம் நடைபெற்ற சமயத்தில் ஹர்பஜன் சிங் வீட்டில் இல்லை என்று அவரது குடும்பத்தினர் தரப்பில் தெரிவிக்கப்பட்டுள்ளது. கட்சித் தாவிய உறுப்பினர்களுக்கு எதிராக ஆம் ஆத்மி தொண்டர்கள் தொடர்ந்து பல்வேறு இடங்களில் போராட்டங்களை நடத்தி வருகின்றனர். ஒரே நேரத்தில் 7 முக்கிய உறுப்பினர்கள் கட்சி மாறியிருப்பது ஆம் ஆத்மி கட்சிக்கு பெரும் பின்னடைவாகப் பார்க்கப்படுகிறது. ஜலந்தரில் ஹர்பஜன் சிங் வீட்டின் சுவர் அவமதிக்கப்பட்ட சம்பவம் தற்போது தேசிய அளவில் ஊடகங்களில் பேசுபொருளாக மாறியுள்ளது.