கொடூர வெப்ப அலை... 18 லட்சம் கோழிகள் சுருண்டு விழுந்து பலி!

ஆந்திர மாநிலம் முழுவதும் கடந்த சில நாட்களாகக் கோடை வெயிலின் தாக்கம் மிக உக்கிரமாக உருவெடுத்து, பொதுமக்களை மட்டுமின்றி கால்நடைகளையும் வாட்டி வதைத்து வருகிறது. இங்கு  நிலவி வரும் இந்த கடுமையான வெப்ப அலை காரணமாக, கடந்த 4 நாட்களில் மட்டும் பண்ணைகளில் வளர்க்கப்பட்டு வந்த 18 லட்சத்திற்கும் அதிகமான கோழிகள் வெயிலின் கொடுமை தாங்காமல் அடுத்தடுத்து சுருண்டு விழுந்து பரிதாபமாக உயிரிழந்துள்ளன.

வெப்பத்தின் கொடூரத் தாக்குதலால் கோழிகள் ஒட்டுமொத்தமாக மடிந்து போனதால்  மாநிலத்தைச் சேர்ந்த கோழிப் பண்ணையாளர்களுக்கு ரூ.54 கோடிக்கும் மேல் பெரும் நிதி இழப்பும் நஷ்டமும் ஏற்பட்டு அவர்களின் வாழ்வாதாரம் முற்றிலும் முடங்கியுள்ளது. இந்த திடீர் சோகம் குறித்துப் பெரும் கவலை தெரிவித்துள்ள மாநில கோழி பண்ணையாளர்கள் சங்க பொதுச்செயலாளர் படாலா சுப்பா ரெட்டி, பண்ணையாளர்களின் தற்போதைய அவல நிலையை விவரித்துள்ளார்.

கடந்த 40 ஆண்டுகளில் இல்லாத அளவுக்கு இந்த ஆண்டு மிக மோசமான இயற்கை பேரிடரைத் தாங்கள் சந்தித்து வருவதாக அவர் வேதனையுடன் குறிப்பிட்டுள்ளார். தங்களது வாழ்வாதாரத்தை அடியோடு அழித்துள்ள இந்த கடுமையான இயற்கை பேரிடரிலிருந்து தங்களைக் காக்கவும், நஷ்டமடைந்த பண்ணையாளர்களின் மறுவாழ்விற்காகவும் அரசு உடனடியாக தலையிட்டு உரிய நிதியுதவி மற்றும் நிவாரணங்களை வழங்க வேண்டும் என அவர் கோரிக்கை விடுத்துள்ளார்.