சென்னையில் கொட்டித்தீர்த்த கனமழை... தரையிறங்க முடியாமல் வானில் வட்டமடித்த விமானங்கள்! 15-க்கும் மேற்பட்ட சேவைகள் பாதிப்பு!

தமிழகத்தில் நிலவி வரும் வளிமண்டல மேலடுக்கு சுழற்சி காரணமாக, சென்னை மற்றும் அதன் புறநகர் பகுதிகளில் இன்று பிற்பகலில் இடி, மின்னலுடன் கூடிய கனமழை பெய்தது. இந்தத் திடீர் மழையினால் சென்னை சர்வதேச விமான நிலையத்தில் விமானப் போக்குவரத்து கடுமையாக நிலைகுலைந்தது. மழை மற்றும் மேகமூட்டம் காரணமாகக் குறைவான பார்வைத்திறன் நிலவியதால், சென்னைக்கு வந்த விமானங்கள் தரையிறங்குவதில் சிக்கல் ஏற்பட்டது.

பெங்களூரு மற்றும் மும்பையிலிருந்து வந்த இண்டிகோ ஏர்லைன்ஸ் விமானங்கள் உட்பட மொத்தம் 5 விமானங்கள் தரையிறங்க அனுமதி கிடைக்காமல் நீண்ட நேரம் நடுவானில் வட்டமடித்தன. நிலைமையை உன்னிப்பாகக் கவனித்த விமான நிலையக் கட்டுப்பாட்டு அறை அதிகாரிகள், எரிபொருள் சிக்கனம் மற்றும் பயணிகளின் பாதுகாப்பைக் கருதி, இந்த விமானங்களை பெங்களூரு விமான நிலையத்திற்குத் திருப்பி அனுப்பத் தேவையான ஏற்பாடுகளைச் செய்தனர். மழையின் தீவிரம் காரணமாகச் சென்னையிலிருந்து நாட்டின் பிற பகுதிகளுக்குப் புறப்பட வேண்டிய 10 விமானங்கள் தாமதமாகியுள்ளன:

அகமதாபாத், டெல்லி, கண்ணூர், தூத்துக்குடி, கோவை, சேலம் உள்ளிட்ட நகரங்களுக்குச் செல்ல வேண்டிய விமானங்கள் ஓடுதளத்திலேயே நிறுத்தி வைக்கப்பட்டன. வானிலை சீரான பிறகே இந்த விமானங்கள் தாமதமாகப் புறப்படும் எனத் தெரிவிக்கப்பட்டுள்ளதால், பயணிகள் நீண்ட நேரம் காத்திருக்க வேண்டிய சூழல் உருவானது.

திடீர் மழையினால் இதுவரையில் 15-க்கும் மேற்பட்ட விமானச் சேவைகள் பாதிக்கப்பட்டுள்ளன. இதனால் சென்னை விமான நிலையத்தில் பயணிகள் கடும் அவதிக்குள்ளாகினர். விமான நிலைய அதிகாரிகள் மற்றும் பணியாளர்கள் பயணிகளுக்குத் தேவையான தகவல்களை உடனுக்குடன் வழங்கி வருகின்றனர்.

வானிலை ஆய்வு மையத்தின் கணிப்புப்படி, அடுத்த சில மணி நேரங்களுக்குப் புறநகர் பகுதிகளில் மழை நீடிக்க வாய்ப்புள்ளதால், விமானச் சேவைகளில் மேலும் மாற்றங்கள் இருக்கக்கூடும் என எதிர்பார்க்கப்படுகிறது.