தமிழகத்தில் அடுத்த 5 நாட்களுக்கு இந்த மாவட்டங்களில் கனமழை.. பத்திரம் மக்களே!

தமிழகத்தில் கோடை வெப்பம் வாட்டி வதைத்து வரும் நிலையில், மக்களுக்குக் குளிர்ச்சியான செய்தியை சென்னை வானிலை ஆய்வு மையம் வெளியிட்டுள்ளது. தென்மேற்கு பருவமழை தொடங்குவதற்கான அறிகுறிகள் தென்படுவதால், அடுத்த ஐந்து நாட்களுக்குத் தமிழகத்தின் பல்வேறு மாவட்டங்களில் கனமழை பெய்ய வாய்ப்புள்ளதாகத் தெரிவிக்கப்பட்டுள்ளது.

தென்மேற்கு பருவமழை இந்த ஆண்டு சற்று முன்னதாகவே அந்தமான் நிகோபார் தீவுப் பகுதிகளில் மே 16-ம் தேதி தொடங்க வாய்ப்புள்ளதாக வானிலை ஆய்வு மையம் கணித்துள்ளது. இதன் தாக்கத்தால் தமிழகத்தின் பல்வேறு பகுதிகளிலும் பரவலாக மழை பெய்யத் தொடங்கியுள்ளது. அடுத்த ஐந்து நாட்களுக்கு தமிழகத்தில் பல மாவட்டங்களில் பரவலாக கனமழை பெய்யும் என அறிவிக்கப்பட்டுள்ளது. 

இன்று (மே 15): கோவை மாவட்டத்தின் மலைப்பகுதிகள், நீலகிரி, ராமநாதபுரம், சிவகங்கை, மதுரை, தேனி மற்றும் திண்டுக்கல் மாவட்டங்களில் ஓரிரு இடங்களில் இடி மின்னலுடன் கூடிய கனமழை பெய்யக்கூடும்.

மே 16: நீலகிரி மற்றும் கோவை மாவட்டங்களில் கனமழை தொடர வாய்ப்புள்ளது.

மே 17: மேற்குத் தொடர்ச்சி மலையை ஒட்டிய மாவட்டங்களான நீலகிரி, கோவை, ஈரோடு மற்றும் வட மாவட்டங்களான சேலம், தர்மபுரி, கிருஷ்ணகிரி மாவட்டங்களில் கனமழை பெய்யக்கூடும்.

மே 18 & 19: நீலகிரி, கோவை, ஈரோடு, சேலம், தர்மபுரி, கிருஷ்ணகிரி மற்றும் தேனி மாவட்டங்களில் ஓரிரு இடங்களில் இடி மின்னலுடன் கூடிய கனமழை நீடிக்கும் என்று வானிலை மையம் எச்சரித்துள்ளது.

இடி மின்னலுடன் கூடிய மழை பெய்யும் போது பொதுமக்கள் திறந்தவெளிகளில் நிற்பதைத் தவிர்க்குமாறும், மரங்களின் அடியில் தஞ்சம் அடைய வேண்டாம் என்றும் அறிவுறுத்தப்பட்டுள்ளனர். மலைப்பகுதிகளுக்குப் பயணம் மேற்கொள்வோர் தட்பவெப்ப நிலையைச் சரிபார்த்துவிட்டுச் செல்லுமாறு கேட்டுக்கொள்ளப்படுகிறார்கள்.

இந்தத் தொடர் மழையினால் தமிழகத்தின் முக்கிய நீர்நிலைகளுக்கு நீர்வரத்து அதிகரிக்கும் என்றும், நிலத்தடி நீர்மட்டம் உயர வாய்ப்புள்ளதாகவும் எதிர்பார்க்கப்படுகிறது. கோடை வெயிலுக்குப் பிறகு பெய்யும் இந்த மழை விவசாயிகளிடையே மகிழ்ச்சியை ஏற்படுத்தியுள்ளது.