இந்து முன்னணி நிர்வாகி சசிக்குமார் கொலை வழக்கு: 4 பேருக்கு ஆயுள் தண்டனை விதித்து என்ஐஏ நீதிமன்றம் தீர்ப்பு!

கோவையில் கடந்த 2016 ஆம் ஆண்டு நிகழ்த்தப்பட்ட இந்து முன்னணி பிரமுகர் சசிக்குமார் படுகொலை வழக்கில், பாப்புலர் பிரண்ட் ஆஃப் இந்தியா (PFI) அமைப்பைச் சேர்ந்த 4 பேருக்கு ஆயுள் தண்டனை விதித்துச் சென்னை பூந்தமல்லி என்ஐஏ சிறப்பு நீதிமன்றம் தீர்ப்பளித்துள்ளது.

கோவையில் கடந்த 2016 ஆம் ஆண்டு செப்டம்பர் 22 ஆம் தேதியன்று இந்து முன்னணி பிரமுகர் சசிக்குமார் மர்மமான முறையில் படுகொலை செய்யப்பட்டார். இச்சம்பவம் அப்பகுதியில் பெரும் பதற்றத்தை ஏற்படுத்தியதைத் தொடர்ந்து, தடை செய்யப்பட்ட அமைப்புகளுடன் தொடர்புடைய இந்த வழக்கின் விசாரணை தேசியப் புலனாய்வு முகமைக்கு மாற்றப்பட்டது.

தீவிர விசாரணைக்குப் பிறகு என்ஐஏ தரப்பில் தாக்கல் செய்யப்பட்ட குற்றப்பத்திரிகையின் அடிப்படையில், இவ்வழக்கில் தொடர்புடைய சையது அபுதாகிர், முபாரக், முகமது ரபிகுல் ஹசன் மற்றும் சுபைர் ஆகிய 4 பேரின் மீதான குற்றச்சாட்டுகள் நீதிமன்றத்தில் நிரூபிக்கப்பட்டன.

இந்த வழக்கை விசாரித்த பூந்தமல்லி என்ஐஏ சிறப்பு நீதிமன்ற நீதிபதி, குற்றம் சாட்டப்பட்ட மேற்கண்ட 4 பேருக்கும் ஆயுள் தண்டனை விதித்து இன்று அதிரடி உத்தரவு பிறப்பித்தார். மேலும், இவ்வழக்கில் விசாரிக்கப்பட்ட மற்றொரு நபர் நீதிமன்றத்தால் விடுவிக்கப்பட்டுள்ளார்.