விம்பிள்டனில் வரலாற்றுச் சாதனை... நடப்பு சாம்பியன் இகா ஸ்வியாடெக்கை வீழ்த்திய பிலிப்பைன்ஸின் அலெக்சாண்ட்ரா!

இங்கிலாந்தின் லண்டன் நகரில் நடைபெற்று வரும் உலகப் புகழ்பெற்ற விம்பிள்டன் டென்னிஸ் தொடரில் மிகப்பெரிய அதிர்ச்சித் திருப்பம் ஏற்பட்டுள்ளது. மகளிர் ஒற்றையர் பிரிவின் 3-ஆவது சுற்று ஆட்டத்தில், உலகின் நம்பர்-1 வீராங்கனையும் நடப்பு சாம்பியனுமான போலந்தின் இகா ஸ்வியாடெக்கை , பிலிப்பைன்ஸ் நாட்டின் இளம் வீராங்கனை அலெக்சாண்ட்ரா ஈலா (Alexandra Eala) அதிரடியாக வீழ்த்தி வரலாற்றுச் சாதனை படைத்துள்ளார்.

டென்னிஸ் உலகின் அசைக்க முடியாத சக்தியாக விளங்கும் இகா ஸ்வியாடெக் மற்றும் பிலிப்பைன்ஸின் 21 வயதே ஆன இளம் வீராங்கனை அலெக்சாண்ட்ரா ஈலா ஆகியோருக்கு இடையே நடைபெற்ற இந்த 3-வது சுற்று ஆட்டம் ரசிகர்களைக் கொண்டாட வைத்திருக்கிறது. 

ஆட்டத்தின் தொடக்கத்திலிருந்தே அலெக்சாண்ட்ரா ஈலா, நடப்பு சாம்பியனான ஸ்வியாடெக்கிற்கு ஈடுகொடுத்து அதிரடி ஆட்டத்தை வெளிப்படுத்தினார். இதனால் முதல் செட் டை-பிரேக்கர் வரை சென்றது. இதில் மிகக் கடுமையான போராட்டத்திற்குப் பிறகு ஈலா 7-6 (11-9) என்ற கணக்கில் முதல் செட்டைக் கைப்பற்றினார்.

முதல் செட்டை இழந்த அதிர்ச்சியிலிருந்து மீளாத ஸ்வியாடெக்கிற்கு, 2-ஆவது செட்டில் அலெக்சாண்ட்ரா ஈலா அடுக்கடுக்கான ஏஸ் மற்றும் ஃபோர்ஹேண்ட் ஷாட்டுகள் மூலம் கடுமையான அழுத்தத்தைக் கொடுத்தார். இறுதியில் 2-ஆவது செட்டை 6-2 என்ற கணக்கில் மிக எளிதாகக் கைப்பற்றி, நேர் செட்களில் ஸ்வியாடெக்கிற்கு அதிர்ச்சித் தோல்வியளித்தார்.

டென்னிஸ் வரலாற்றில் இதுவரை எந்தவொரு பிலிப்பைன்ஸ் நாட்டு வீரரோ அல்லது வீராங்கனையோ செய்யாத மாபெரும் சாதனையை அலெக்சாண்ட்ரா ஈலா நிகழ்த்தியுள்ளார். இந்த மாபெரும் வெற்றியின் மூலம், உலகின் மிக உயரிய கிராண்ட்ஸ்லாம் டென்னிஸ் தொடரின் ஒற்றையர் பிரிவில் 4-ஆவது சுற்றுக்கு தகுதி பெற்ற முதல் பிலிப்பைன்ஸ் நாட்டவர் என்ற வரலாற்றுப் பெருமையையும், சாதனையையும் 21 வயதான அலெக்சாண்ட்ரா ஈலா தட்டிச் சென்றுள்ளார்.

நடப்பு சாம்பியனான இகா ஸ்வியாடெக் விம்பிள்டன் தொடரிலிருந்து இவ்வளவு சீக்கிரமாக வெளியேறியுள்ளது டென்னிஸ் ரசிகர்கள் மற்றும் விமர்சகர்கள் மத்தியில் மிகப்பெரிய ஆச்சரியத்தை ஏற்படுத்தியுள்ளது. அதே வேளையில், பிலிப்பைன்ஸ் நாட்டின் டென்னிஸ் வரலாற்றைத் மாற்றி எழுதியுள்ள இளம் வீராங்கனை அலெக்சாண்ட்ரா ஈலாவிற்குச் சர்வதேச விளையாட்டுப் பிரபலங்கள் பலரும் தங்களது வாழ்த்துகளைத் தெரிவித்து வருகின்றனர்.