தமிழகத்தில் கர்ப்பிணிகளுக்கு ரூ.18,000 உதவித்தொகை - விண்ணப்பிப்பது எப்படி? முழு வழிகாட்டி!

தமிழகத்தில் கர்ப்பிணிப் பெண்களின் ஆரோக்கியத்தையும், குழந்தைகளின் ஊட்டச்சத்தையும் உறுதி செய்ய 'டாக்டர் முத்துலட்சுமி ரெட்டி மகப்பேறு நிதி உதவித் திட்டம்' மிகச் சிறப்பாகச் செயல்படுத்தப்பட்டு வருகிறது.

தமிழக அரசின் சுகாதாரத்துறை சார்பில் ஏழை கர்ப்பிணிப் பெண்களுக்கு வழங்கப்படும் மகப்பேறு நிதி உதவித் திட்டம், தாய்-சேய் இறப்பு விகிதத்தைக் குறைக்கப் பெரும் உதவியாக உள்ளது. இத்திட்டத்தின் கீழ் தகுதியுள்ள பெண்களுக்கு மொத்தம் ₹18,000 மதிப்பிலான உதவிகள் வழங்கப்படுகின்றன.

இந்த ₹18,000 என்பது ரொக்கப்பணம் மற்றும் ஊட்டச்சத்துப் பெட்டகம் என 5 தவணைகளாகப் பிரித்து வழங்கப்படுகிறது: முதல் தவணை கர்ப்பம் தரித்த 12 வாரங்களுக்குள் பதிவு செய்த பின் - ₹2,000 மற்றும் முதல் ஊட்டச்சத்து பெட்டகம் (மதிப்பு ₹2,000). இரண்டாம் தவணையாக கர்ப்பம் தரித்த 4-வது மாதம் - ₹2,000. மூன்றாம் தவணையாக கர்ப்பம் தரித்த 6-வது மாதம் - ₹2,000 மற்றும் இரண்டாம் ஊட்டச்சத்து பெட்டகம் (மதிப்பு ₹2,000). நான்காம் தவணையாக அரசு மருத்துவமனையில் குழந்தை பிறந்தவுடன் - ₹4,000. ஐந்தாம் தவணையாக குழந்தைக்குத் தடுப்பூசிகள் (மூன்றாம் தவணைத் தடுப்பூசி வரை) போட்டு முடித்த பின் - ₹4,000.

இத்திட்டத்தில் பயன்பெற பிக்மி (PICME - Pregnancy and Infant Cohort Monitoring and Evaluation) பதிவு மிக முக்கியமானது. picme.tn.gov.in அல்லது picme3.tn.gov.in என்ற இணையதளத்திற்குச் சென்று 'Pre-registration by Public' என்பதைத் தேர்வு செய்து, உங்கள் விபரங்களைப் பதிவு செய்து 12 இலக்க ஆர்.சி.எச் (RCH ID) எண்ணைப் பெறலாம்.

அருகில் உள்ள அரசு ஆரம்பச் சுகாதார நிலையம், அரசு மருத்துவமனை அல்லது அங்கன்வாடி மையங்களை அணுகி, அங்கிருக்கும் கிராம சுகாதாரச் செவிலியரிடம் (VHN) விபரங்களைக் கொடுத்துப் பதிவு செய்யலாம்.

ஆதார் அட்டை (தாய் மற்றும் தந்தை), வங்கி கணக்குப் புத்தகம் (தாயின் பெயரில் இருக்க வேண்டும்), குடும்ப அட்டை, வாக்காளர் அடையாள அட்டை, வருமானச் சான்றிதழ் (ஆண்டு வருமானம் ₹1.20 லட்சத்திற்குள் இருக்க வேண்டும்) ஆகிய ஆவணங்கள் தேவைப்படும்.

மொத்த பலன்: ₹18,000 (₹14,000 ரொக்கம் + ₹4,000 மதிப்புள்ள 2 ஊட்டச்சத்துப் பெட்டகங்கள்). வறுமைக் கோட்டிற்கு கீழ் உள்ளவர்கள் மற்றும் அரசு மருத்துவமனையில் பிரசவம் பார்ப்பவர்கள் இந்த உதவித்தொகையைப் பெற தகுதியுடையவர்கள். கர்ப்பமான 12 வாரங்களுக்குள் (முதல் 3 மாதங்கள்) பிக்மி (PICME) பதிவு செய்வது அவசியம்.