இந்திய வனத்துறையின் ஜாம்பவான் - பத்மபூஷன் விருது வென்ற முதல் ஐ.எஃப்.எஸ் (IFS) அதிகாரி எச்.எஸ்.பவார் காலமானார்!

இந்தியாவின் காடுகள் மற்றும் வனவிலங்கு பாதுகாப்புத் துறையின் ஆகச்சிறந்த முன்னோடியும், பத்மபூஷன் விருது பெற்ற முதல் இந்திய வனப்பணி அதிகாரியுமான ஹேமேந்திர சிங் பவார் காலமானார். அவருக்கு வயது 89. அவரது மறைவு ஒட்டுமொத்த இந்திய சுற்றுச்சூழல் ஆர்வலர்கள் மற்றும் வனத்துறை அதிகாரிகள் மத்தியில் பெரும் சோகத்தை ஏற்படுத்தியுள்ளது.

இந்தியாவில் புலிகள் அழியும் நிலைக்குத் தள்ளப்பட்ட போது, அவற்றைக் காப்பதற்காக மத்திய அரசால் தொடங்கப்பட்ட உலகப் புகழ்பெற்ற 'புராஜெக்ட் டைகர்' (புலிகள் பாதுகாப்புத் திட்டம்) திட்டத்தில் எச்.எஸ்.பவார் அவர்களின் பங்களிப்பு அளப்பரியது. இத்திட்டத்தின் இயக்குனராகப் பொறுப்பேற்ற அவர், இந்தியாவில் புலிகளின் எண்ணிக்கையை அதிகரிக்கவும், அவற்றின் வாழ்விடங்களைப் பாதுகாக்கவும் பல்வேறு சர்வதேச தரத்திலான அறிவியல் பூர்வமான பாதுகாப்பு நடைமுறைகளை வகுத்துச் செயல்படுத்தினார்.

மத்தியப் பிரதேசத்தில் உள்ள புகழ்பெற்ற கான்ஹா தேசிய பூங்காவின் முக அமைப்பை மாற்றி, அதனை இந்தியாவின் மிகச்சிறந்த முதன்மைப் புலிகள் காப்பகமாக மாற்றிய பெருமை இவரையே சேரும். இந்தியாவில் வனவிலங்கு குறித்த ஆராய்ச்சிகள் மற்றும் அதிகாரிகளுக்கான பயிற்சிகளை முறைப்படுத்த அவர் மேற்கொண்ட முக்கிய முயற்சி.

உத்தரகாண்ட் மாநிலம் டேராடூனில் அமைந்துள்ள, ஆசியாவின் மிக முக்கிய வனவிலங்கு ஆராய்ச்சி நிறுவனமான 'இந்திய வனவிலங்கு நிறுவனம்' தொடங்கப்பட்ட போது, அதன் முதலாவது நிறுவன இயக்குனராகப் பொறுப்பேற்று, அதனைப் பிற்காலத் தலைமுறையினருக்கான சிறந்த கல்வி மற்றும் ஆராய்ச்சி மையமாக எச்.எஸ்.பவார் செதுக்கினார்.

இந்தியாவின் சுற்றுச்சூழல், காடுகள் மற்றும் வனவிலங்கு பாதுகாப்பிற்காகத் தனது வாழ்நாள் முழுவதையும் அர்ப்பணித்த அவரது ஒப்பற்ற சேவையைப் பாராட்டி மத்திய அரசு உயரிய அங்கீகாரத்தை வழங்கியது.

கடந்த 2013-ஆம் ஆண்டு இந்தியாவின் உயரிய குடிமை விருதுகளில் ஒன்றான "பத்மபூஷன்"  விருது இவருக்கு வழங்கி கௌரவிக்கப்பட்டது. இதன் மூலம் இந்திய வனப்பணியில் பத்மபூஷன் விருதைப் பெற்ற முதலாவது அதிகாரி என்ற வரலாற்றுப் பெருமையையும் அவர் பெற்றார்.