ஊழலுக்கு எதிராக 47 சட்டத்திருத்தங்கள் - எம்.பி., நீதிபதிகளுக்கும் கட்டுப்பாடுகள் - ஹங்கேரி பிரதமர் அதிரடி நடவடிக்கை!

ஐரோப்பிய நாடான ஹங்கேரியில் 16 ஆண்டுகால விக்டர் அர்பனின் ஆட்சிக்கு முற்றுப்புள்ளி வைத்து, அண்மையில் புதிய பிரதமராகப் பொறுப்பேற்ற பீட்டர் மக்யார் அந்நாட்டு அரசியல் அமைப்பையே மாற்றியமைக்கும் நடவடிக்கைகளில் இறங்கியுள்ளார். 'திசா' கட்சித் தலைவரான இவர், நாடாளுமன்றத்தில் தனக்குள்ள மூன்றில் இரண்டு பங்கு பலத்தைப் பயன்படுத்திப் பல தசாப்த கால அரசியல் விதிகளை மாற்றியமைக்கத் திட்டமிட்டுள்ளார்.

ஊழலை வேரறுக்கவும், முந்தைய ஆட்சிக்காலத்தின் சர்வாதிகாரப் போக்குகளை மாற்றியமைக்கவும் ஒரே நேரத்தில் 47 புதிய சட்டத்திருத்தங்களை அவர் நாடாளுமன்றத்தில் முன்மொழிந்துள்ளார். முந்தைய பிரதமர் விக்டர் அர்பனின் ஆதரவாளராகக் கருதப்படும் தற்போதைய ஹங்கேரி அதிபர் தமாஸ் சுல்யோக் பதவி விலக வேண்டும் என்று பீட்டர் மக்யார் கெடு விதித்திருந்தார்.

அதிபர் தமாஸ் சுல்யோக் பதவி விலக மறுத்ததைத் தொடர்ந்து, அவரைப் பதவியிலிருந்து அதிரடியாக நீக்குவதற்கு ஏதுவாகப் புதிய அரசமைப்புச் சட்டத்திருத்தத்தை மேற்கொள்ளப் பிரதமர் மக்யார் உத்தரவிட்டுள்ளார். அதிபர் பதவி என்பது ஹங்கேரியில் பெரும்பாலும் பெயரளவு பதவியாக இருந்தாலும், புதிய சட்டங்களுக்கு ஒப்புதல் அளிக்கும் முக்கிய அதிகாரம் கொண்டது என்பதால், அவர் தங்களின் சீர்திருத்தங்களைத் தடுக்காமல் இருக்க இந்த நடவடிக்கை எடுக்கப்பட்டுள்ளது.

அரசியல்வாதிகள் மற்றும் நீதித்துறை அதிகாரிகள் நீண்ட காலம் ஒரே பதவியில் நீடித்து ஊழல் முறைகேடுகளில் ஈடுபடுவதைத் தடுக்கப் புதிய கட்டுப்பாடுகள் விதிக்கப்படவுள்ளன. நாடாளுமன்ற உறுப்பினர்கள் (MPs) தங்களின் வாழ்நாளில் அதிகபட்சமாக 12 ஆண்டுகள் மட்டுமே பதவியில் நீடிக்க முடியும் என்ற வரலாற்றுச் சிறப்புமிக்கக் கட்டுப்பாடு கொண்டு வரப்படுகிறது.

நீதித்துறையின் சுதந்திரத்தை உறுதி செய்யவும், தகுதியான நீதிபதிகளின் அனுபவத்தைப் பயன்படுத்தவும் அவர்களின் ஓய்வு பெறும் வயது 70 ஆக உயர்த்தப்படவுள்ளது. முந்தைய ஆட்சிக்காலத்தில் அரசுப் பணமும், தேசியச் சொத்துகளும் முறைகேடாகக் கொள்ளையடிக்கப்பட்டதாகக் குற்றம் சாட்டியுள்ள பிரதமர், அவற்றை மீட்கவும் இனிவரும் காலங்களில் சொத்துகளைப் பாதுகாக்கவும் "தேசிய சொத்து பாதுகாப்பு அமைப்பு"  என்ற புதிய அமைப்பை உருவாக்கவுள்ளார்.

"ஹங்கேரி நாடு விக்டர் அர்பனுக்கோ அல்லது தமாஸ் சுல்யோக்கிற்கோ சொந்தமானது அல்ல; அது மக்களுக்குச் சொந்தமானது" என்று பிரகடனப்படுத்தியுள்ள பிரதமர் பீட்டர் மக்யாரின் இந்த 47 அதிரடி சட்டத்திருத்தங்கள் ஹங்கேரி மட்டுமின்றி ஒட்டுமொத்த ஐரோப்பிய அரசியலிலும் பெரும் பரபரப்பை ஏற்படுத்தியுள்ளது.

ஹங்கேரியின் புதிய பிரதமராகப் பீட்டர் மக்யார் பொறுப்பேற்ற போது, அந்நாட்டின் ஜனநாயகம் மற்றும் வெளிப்படைத்தன்மையை மீட்டெடுப்பதாக மக்களுக்கு உறுதியளித்து ஆற்றிய வரலாற்றுச் சிறப்புமிக்க உரையைக் காண இந்த வீடியோ உங்களுக்கு உதவும்.