ஹைதராபாத்தில், சாலையோரம் நிறுத்தப்பட்டிருந்த காரின் உதிரி டயரைத் திருடிச் சென்ற நபரின் சிசிடிவி காட்சிகள் சமூக வலைதளங்களில் வைரலாகி வருகின்றன.

சில நொடிகளில் டயரைத் திருடிய நபர்

தெலங்கானா மாநிலம் ஹைதராபாத்தின் சந்திராயங்குட்டா பகுதியில், கடந்த அக்டோபர் 24-ஆம் தேதி இந்தச் சம்பவம் நடந்ததாகத் தகவல் வெளியாகியுள்ளது. இருசக்கர வாகனத்தில் வந்த நபர், நிறுத்தப்பட்டிருந்த எஸ்யூவி காரின் பின்புறத்தில் பொருத்தப்பட்டிருந்த உதிரி டயரை அகற்றிவிட்டு, அதைத் தனது வாகனத்தில் எடுத்துச் சென்றதாகக் கூறப்படுகிறது.

இந்தச் சம்பவம் தொடர்பான சுமார் 13 விநாடிகள் கொண்ட சிசிடிவி காட்சி இணையத்தில் பரவி வருகிறது. திருட்டில் ஈடுபட்டதாகச் சந்தேகிக்கப்படும் நபர் சுபான் என அடையாளம் காணப்பட்டுள்ளதாகவும், அவர் மீது பாரதிய நியாய சன்ஹிதா சட்டத்தின் கீழ் வழக்குப் பதிவு செய்யப்பட்டுள்ளதாகவும் போலீஸார் தெரிவித்துள்ளனர்.

போலீஸார் விசாரணை

ஹைதராபாத்தின் சில பகுதிகளில் எஸ்யூவி கார்களின் உதிரி டயர்கள் திருடப்படுவது குறித்து புகார்கள் எழுந்துள்ளன. சிசிடிவி காட்சிகளை ஆய்வு செய்து, சம்பந்தப்பட்ட நபர்களைப் பிடிக்க போலீஸார் நடவடிக்கை எடுத்து வருகின்றனர். இந்தச் சம்பவம் வாகன உரிமையாளர்கள் மத்தியில் கவனத்தை ஈர்த்துள்ளது.