"நான் அனைவருக்கும் பொதுவானவன்": 'வீ த லீடர்ஸ்' மாநாட்டில் அண்ணாமலை பேச்சு!

"நான் முதலில் இந்தியன், இரண்டாவது தமிழன்; மதத்தின் அடிப்படையில் நான் இந்துவாக இருப்பது எனது வீட்டிற்குள் மட்டுமே. வீட்டை விட்டு வெளியில் வரும்போது நான் இந்த நாட்டின் அனைவருக்கும் பொதுவானவன்" என்று பொள்ளாச்சி மாநாட்டில் அண்ணாமலை விளக்கம் அளித்துப் பேசியுள்ளார்.

கோவை மாவட்டம் பொள்ளாச்சியில் இன்று நடைபெற்று வரும் ‘வீ த லீடர்ஸ்’ அமைப்பின் மாநாட்டில் சிறப்பு விருந்தினராகக் கலந்துகொண்டு உரையாற்றிய போது, "பாஜகவின் பி டீம் தான் அண்ணாமலையா என்ற சந்தேகம்  திமுகவினருக்கு எழுந்துள்ளது. அதற்கான பதிலை நான் இங்குத் தெளிவாகப் பதிவு செய்ய விரும்புகிறேன். நான் ஒரு முழுமையான தேசியவாதி. எனது அடையாளத்தில் நான் எப்போதுமே முதலாவதாக ஓர் இந்தியன், இரண்டாவதாகத் தான் தமிழன்" என்று குறிப்பிட்டார்.

மதம் என்பது ஒரு தனி மனிதனின் கோட்பாடு. அந்த அடிப்படையில் நான் ஒரு இந்து. ஆனால், அந்த அடையாளம் எனது வீட்டிற்குள் மட்டுமே இருக்கும். நான் வீட்டை விட்டு பொதுவெளிக்கு வரும்போது, சாதி, மதப் பேதங்களைக் கடந்து இந்தச் சமூகத்தின் ஒட்டுமொத்த மக்கள் அனைவருக்கும் பொதுவானவனாகவே இந்த அண்ணாமலை செயல்படுவான் என்று அவர்  முழக்கமிட்டார்.

தமிழகத்தின் தற்போதைய புதிய அரசியல் மாற்றங்களுக்கு மத்தியில், பொள்ளாச்சி மண்ணில் நடைபெற்ற இந்த மாநாட்டு மேடையில் தனது தேசிய மற்றும் சமூக அடையாளங்கள் குறித்து அண்ணாமலை மிகத் தெளிவாகவும் காரசாரமாகவும் பேசியுள்ளது  சமூக வலைத்தளங்கள் மற்றும் அரசியல் வட்டாரங்களில் ஆகப்பெரும் பேசுபொருளாக மாறியுள்ளது.