"சினிமாவுக்கு வராமல் இருந்திருந்தால் இந்நேரம் எனக்குத் திருமணம் ஆகியிருக்கும்!" - நடிகை அனீஷ்மா!

தமிழ் மற்றும் மலையாளத் திரையுலகில் வளர்ந்து வரும் இளம் நடிகையான அனீஷ்மா அனில் குமார், சமீபத்திய பேட்டி ஒன்றில் தனது தனிப்பட்ட வாழ்க்கை, குடும்பச் சூழல் மற்றும் சினிமா பயணம் குறித்துப் பகிர்ந்துள்ள தகவல்கள் இணையத்தில் வைரலாகி வருகின்றன.

'சிறை', 'யூத்', 'மொத ராத்திரி' போன்ற படங்களின் மூலம் அறியப்பட்ட அனீஷ்மா, தான் சினிமாத்துறைக்கு வராமல் இருந்திருந்தால், தனது குடும்பச் சூழல் மற்றும் கலாச்சாரத்தின்படி இந்நேரம் தனக்குத் திருமணம் முடிந்து ஒரு குடும்பத் தலைவியாக மாறியிருப்பேன் என்று தெரிவித்துள்ளார். தனது குடும்பத்தில் காதல் திருமணங்களுக்கு அனுமதியில்லை என்பதையும் அவர் குறிப்பிட்டுள்ளார்.

சினிமா வாய்ப்பு கிடைக்காமல் இருந்திருந்தால் ஒருவேளை அரசு வேலைக்காகப் படித்திருக்கலாம் என்றும், ஆனால் அதில் தனக்கு ஆர்வம் இல்லாததால் அதில் வெற்றி பெற்றிருப்பேனா என்பது சந்தேகமே என்றும் அவர் கூறியுள்ளார்.

ஒரு பெண்ணின் வாழ்க்கைக்குப் பொருளாதாரச் சுதந்திரம் எவ்வளவு முக்கியம் என்பதைச் சுட்டிக்காட்டியுள்ள அனீஷ்மா, ஆரம்பத்தில் திருமணத்திற்கு முக்கியத்துவம் தந்த தனது குடும்பத்தினர், தற்போது தனது திரையுலக வெற்றியைக் பார்த்து மனமாற்றம் அடைந்துள்ளதாகவும், தாங்கள் விரும்பியபடி மகிழ்ச்சியாக வாழ முழு ஆதரவு அளிப்பதாகவும் மகிழ்ச்சியுடன் தெரிவித்துள்ளார்.