வங்கிகளில் 4 முறைக்கு மேல் பணம் எடுத்தால் கட்டணம்... மாணிக்கம் தாகூர் கடும் கண்டனம்!

ஏழை மக்களின் உழைப்பை உறிஞ்சும் கட்டணக் கொள்ளையை மத்திய மோடி அரசும், எஸ்.பி.ஐ. நிர்வாகமும் உடனடியாகத் திரும்பப் பெற வேண்டும் என தமிழ்நாடு காங்கிரஸ் கமிட்டி தலைவர் மாணிக்கம் தாகூர் தெரிவித்துள்ளார். இதுதொடர்பாக அவர் வெளியிட்டுள்ள கண்டன அறிக்கையில், எளிய மக்கள் மீது திணிக்கப்படும் நிதிச் சுமைக்கு உடனடியாக முற்றுப்புள்ளி வைக்க வேண்டும் என்று வலியுறுத்தியுள்ளார்.

காங்கிரஸ் தலைமையிலான ஐக்கிய முற்போக்கு கூட்டணி அரசு கடந்த 2005-ஆம் ஆண்டில் BSBDA ஜீரோ பேலன்ஸ் கணக்குகளை அறிமுகப்படுத்தியது. எளிய மக்களும் வங்கிச் சேவைகளைப் பெறும் வகையில் உருவாக்கப்பட்ட இந்தத் திட்டத்தின் மூலம் ஏழை எளிய மக்கள் பெரிதும் பயனடைந்து வந்தனர். இந்தச் சூழலில் தற்போது இந்தக் கணக்குகள் மீது புதிய கட்டணங்கள் விதிக்கப்பட்டுள்ளது பொதுமக்களிடையே அதிர்ச்சியை ஏற்படுத்தியுள்ளது.

இந்த ஜீரோ பேலன்ஸ் கணக்குகளில் 4 முறைக்கு மேல் ரொக்கம் எடுத்தால் 15 ரூபாயும் அதனுடன் ஜி.எஸ்.டி. கட்டணமும் வசூலிக்கப்படுவதை அவர் கடுமையாகக் கண்டித்துள்ளார். ஏற்கனவே விலைவாசி உயர்வால் பாதிக்கப்பட்டுள்ள சாதாரண மக்களின் மீது இது போன்ற கூடுதல் கட்டணங்களை விதிப்பது ஏற்புடையதல்ல என்று அவர் குறிப்பிட்டுள்ளார். எனவே, பொதுமக்களின் நலனைக் கருத்தில் கொண்டு இந்த கட்டண வசூலை உடனடியாக ரத்து செய்ய வேண்டும் என்றும் அவர் கோரிக்கை விடுத்துள்ளார்.