தமிழகத்தில் இன்று 22 மாவட்டங்களில் மழைக்கு வாய்ப்பு - வானிலை ஆய்வு மையம் எச்சரிக்கை!

தமிழகத்தில் நிலவும் வளிமண்டல மேலடுக்கு சுழற்சி மற்றும் கடலோரப் பகுதிகளில் நிலவும் வானிலை மாற்றங்கள் காரணமாக, மாநிலத்தின் பல்வேறு மாவட்டங்களில் பரவலாக மழை பெய்து வருகிறது. இதன் தொடர்ச்சியாக, இன்று மதியம் 1 மணி வரை தமிழகத்தில் உள்ள 22 மாவட்டங்களில் மழை பெய்ய வாய்ப்புள்ளதாகச் சென்னை வானிலை ஆய்வு மையம் எச்சரித்துள்ளது.

செங்கல்பட்டு, சென்னை, காஞ்சிபுரம், திருவள்ளூர், கோயம்புத்தூர், கடலூர், அரியலூர், கள்ளக்குறிச்சி, கரூர், கிருஷ்ணகிரி, மயிலாடுதுறை, நாகப்பட்டினம், புதுக்கோட்டை, ராமநாதபுரம், ராணிப்பேட்டை, சிவகங்கை, தஞ்சாவூர், நீலகிரி, திருவாரூர், தூத்துக்குடி, வேலூர் மற்றும் விழுப்புரம் ஆகிய 22 மாவட்டங்களில் பகல் நேரம் வரை மழை தொடரக்கூடும் எனத் தெரிவிக்கப்பட்டுள்ளது.

சென்னையின் பல்வேறு பகுதிகளில் ஏற்கெனவே விட்டுவிட்டு கனமழை பெய்து வரும் சூழலில், புதிய அறிவிப்பின் காரணமாகக் குறிப்பிட்ட மாவட்டங்களில் பொதுமக்கள் மற்றும் வாகன ஓட்டிகள் முன்னெச்சரிக்கையுடன் இருக்குமாறு அறிவுறுத்தப்பட்டுள்ளனர். குறிப்பாகத் தாழ்வான பகுதிகளில் வசிப்பவர்கள் மற்றும் நீர்நிலை அருகில் உள்ளவர்கள் பாதுகாப்பான இடங்களில் இருக்கவும், அவசியமின்றி வெளியே செல்வதைத் தவிர்க்கவும் மாவட்ட நிர்வாகங்கள் சார்பில் கேட்டுக் கொள்ளப்பட்டுள்ளது.