தமிழகத்தில் 7 மாவட்டங்களில் மழைக்கு வாய்ப்பு - வானிலை மையம் எச்சரிக்கை!

தமிழகத்தில் கோடை வெயிலின் தாக்கம் குறைந்து, தென்மேற்கு பருவமழை மற்றும் வளிமண்டல மேலடுக்கு சுழற்சி காரணமாக கடந்த சில நாட்களாகவே பல்வேறு மாவட்டங்களில் பரவலாகக் கனமழை பெய்து வருகிறது. வெப்பம் தணிந்து குளிர்ச்சியான சூழல் நிலவி வருவதால் பொதுமக்கள் மற்றும் விவசாயிகள் மகிழ்ச்சியடைந்துள்ளனர்.

இந்நிலையில், இன்று காலை 10 மணி வரை தமிழகத்தின் 7 மாவட்டங்களில் மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் அறிவித்துள்ளது. வானிலை ஆய்வு மையத்தின் தற்போதைய கணிப்பின்படி, நீலகிரி, கோயம்புத்தூர்,  திருப்பூர், ஈரோடு, தென்காசி, கன்னியாகுமரி,  திருநெல்வேலி  ஆகிய மாவட்டங்களில் அடுத்த சில மணி நேரங்களுக்கு மழை நீடிக்கும் எனத் தெரிவிக்கப்பட்டுள்ளது.

குறிப்பாக நீலகிரி, கோவை உள்ளிட்ட மேற்குத்தொடர்ச்சி மலையை ஒட்டியுள்ள மாவட்டங்களிலும், தென் தமிழகத்தின் திருநெல்வேலி, தென்காசி, கன்னியாகுமரி ஆகிய மாவட்டங்களிலும் பரவலாக மிதமான மழை பெய்யக்கூடும். வேலைகளுக்குச் செல்வோர் மற்றும் பள்ளி, கல்லூரிகளுக்குச் செல்லும் வாகன ஓட்டிகள் குடை மற்றும் மழைக்கோட்டுகளைத் தயாராக வைத்துக் கொள்ளுமாறு அறிவுறுத்தப்படுகிறார்கள்.

கடந்த சில நாட்களாகவே நீலகிரி மற்றும் கோவையின் மலைப்பகுதிகளில் பெய்து வரும் மழையால் நீர்நிலைகளுக்கு நீர்வரத்து அதிகரித்துள்ளது குறிப்பிடத்தக்கது. அடுத்தடுத்த நாட்களுக்கான விரிவான வானிலை அறிக்கை மற்றும் கனமழை எச்சரிக்கை குறித்த விபரங்கள் விரைவில் அதிகாரப்பூர்வமாக வெளியாகும் என எதிர்பார்க்கப்படுகிறது.