கேரளாவிலும் இழுபறி... டெல்லியில் காங்., மேலிடம் இன்று அவசர ஆலோசனை!

கேரள மாநில சட்டமன்றத் தேர்தலில் சுமார் 10 ஆண்டுகளுக்குப் பிறகு காங்கிரஸ் கட்சி ஆட்சியைப் பிடித்துப் பெரும் சாதனை படைத்துள்ளது. இருப்பினும், அங்கு முதலமைச்சர் பதவியை யார் அலங்கரிப்பது என்பதில் அக்கட்சிக்குள் பெரும் இழுபறி நீடித்து வருகிறது. பெரும்பாலான சட்டமன்ற உறுப்பினர்கள் கே.சி. வேணுகோபாலுக்குத் தங்களது ஆதரவைத் தெரிவித்துள்ளதாகக் கூறப்படும் நிலையில், மற்ற முக்கியத் தலைவர்களும் முதல்வர் ரேஸில் மல்லுக்கட்டி வருகின்றனர். இதனால் ஏற்பட்டுள்ள அரசியல் குழப்பத்தைத் தீர்க்க, டெல்லியில் இன்று காங்கிரஸ் மேலிடம் முக்கிய ஆலோசனை கூட்டத்தை நடத்துகிறது.

இந்தக் கூட்டத்தில் எடுக்கப்படும் முடிவின் அடிப்படையிலேயே கேரளாவின் அடுத்த முதலமைச்சர் யார் என்பது இறுதி செய்யப்படும் என எதிர்பார்க்கப்படுகிறது. இதேபோல் அண்டை மாநிலமான தமிழகத்திலும் சட்டமன்றத் தேர்தல் முடிவுகளுக்குப் பிறகு ஒரு விதமான அசாதாரண சூழலே நிலவி வருகிறது. தனிப்பெரும் கட்சியாக உருவெடுத்த போதிலும், ஆட்சி அமைப்பதற்கான மெஜாரிட்டி இல்லாத காரணத்தால் தமிழக வெற்றிக் கழகத் தலைவர் விஜய் முதலமைச்சராகப் பதவியேற்பதில் தொடர்ந்து சிக்கல் நீடித்து வருவது குறிப்பிடத்தக்கது. இதனால் தென்னிந்திய அரசியலில் கேரளா மற்றும் தமிழ்நாடு ஆகிய இரு மாநிலங்களிலும் அடுத்தடுத்த நகர்வுகள் என்னவாக இருக்கும் என்ற எதிர்பார்ப்பு எகிறியுள்ளது.

ஒரே நேரத்தில் இரு மாநிலங்களில் ஏற்பட்டுள்ள இந்த அரசியல் முட்டுக்கட்டைகளை உடைக்க அந்தந்தக் கட்சித் தலைமைகள் தீவிரமாகப் போராடி வருகின்றன. கேரளாவில் நிலவும் கோஷ்டிப் பூசலைச் சமாளித்து விரைவில் ஒருமித்த கருத்தை எட்ட வேண்டும் என்பதில் காங்கிரஸ் மேலிடம் உறுதியாக உள்ளது. தமிழகத்தில் நிலவும் பெரும்பான்மை சிக்கலால் ஆளுநரின் முடிவுக்காகத் தவெக காத்திருக்கும் நிலையில், கேரளாவின் முதல்வர் தேர்வு குறித்த அறிவிப்பு இன்று வெளியாகலாம் எனக் கூறப்படுகிறது. இதனால் டெல்லியில் நடைபெறும் இந்தக் காங்கிரஸ் கமிட்டி கூட்டத்தின் மீது ஒட்டுமொத்த அரசியல் வட்டாரத்தின் பார்வையும் தற்போது திரும்பியுள்ளது.