ITR தாக்கல் காலக்கெடு நீட்டிப்பு! நவ.21 வரை அவகாசம் - யாருக்கெல்லாம் பொருந்தும்?

வருமான வரி கணக்கு தாக்கல் செய்வது தொடர்பாக முக்கிய அறிவிப்பை மத்திய நேரடி வரிகள் வாரியம் (CBDT) வெளியிட்டுள்ளது. கணக்குகள் தணிக்கைக்கு உட்படும் குறிப்பிட்ட வரி செலுத்துவோருக்கான 2026-27 மதிப்பீட்டு ஆண்டுக்கான வருமான வரி கணக்கு தாக்கல் கடைசி தேதி நவம்பர் 21, 2026 வரை நீட்டிக்கப்பட்டுள்ளது.இதற்கு முன்பு இந்தப் பிரிவைச் சேர்ந்தவர்கள் அக்டோபர் 31, 2026-க்குள் தங்களது வருமான வரி கணக்கை தாக்கல் செய்ய வேண்டும் என இருந்தது. தற்போது கூடுதலாக 21 நாட்கள் அவகாசம் வழங்கப்பட்டுள்ளது.

அதேபோல், வருமான வரி தணிக்கை அறிக்கையை தாக்கல் செய்வதற்கான கடைசி தேதியும் நீட்டிக்கப்பட்டுள்ளது. முன்னதாக செப்டம்பர் 30, 2026 கடைசி தேதியாக இருந்த நிலையில், தற்போது அக்டோபர் 21, 2026 வரை தணிக்கை அறிக்கையை தாக்கல் செய்யலாம் என CBDT தெரிவித்துள்ளது.

இந்த காலக்கெடு நீட்டிப்பு கணக்குகள் தணிக்கைக்கு உட்படும் குறிப்பிட்ட வரி செலுத்துவோருக்கே பொருந்தும். எனவே, ஏற்கனவே தணிக்கை தேவையில்லாத தனிநபர்களுக்கான AY 2026-27 ITR தாக்கல் காலக்கெடு இதன் மூலம் மீண்டும் நீட்டிக்கப்பட்டதாக கருதக்கூடாது. வருமான வரித்துறையின் தகவல்படி, தணிக்கை தேவையில்லாத பிரிவினருக்கான ITR தாக்கல் காலக்கெடு ஆகஸ்ட் 31, 2026 ஆக இருந்தது.

தணிக்கைக்கு உட்படும் நிறுவனங்கள் மற்றும் பிற தகுதியான வரி செலுத்துவோருக்கு இந்த நீட்டிப்பு கூடுதல் அவகாசத்தை வழங்குகிறது. முதலில் தணிக்கை அறிக்கையை தயாரித்து தாக்கல் செய்த பின்னர், அதனுடன் தொடர்புடைய வருமான வரி கணக்கை தாக்கல் செய்யும் நடைமுறைக்கு இந்த புதிய காலக்கெடு பொருந்தும்.

CBDT-யின் இந்த அறிவிப்பால் வரி செலுத்துவோர் மற்றும் வரி ஆலோசகர்களுக்கு கூடுதல் கால அவகாசம் கிடைத்துள்ளது. குறிப்பிட்ட பிரிவில் வரும் வரி செலுத்துவோர் புதிய கடைசி தேதிக்குள் தங்களது தணிக்கை மற்றும் ITR தாக்கல் பணிகளை முடிப்பது அவசியம்.