ஹார்முஸ் ஜலசந்தியில் போர் பதற்றங்களுக்கு மத்தியில் இந்தியாவுக்கு மேலும் 20 எரிபொருள் கப்பல்கள்!

ஈரான் - இஸ்ரேல் மோதலால் ஹார்முஸ் ஜலசந்தி பகுதியில் போர் மேகங்கள் சூழ்ந்துள்ள நிலையிலும், இந்தியாவின் கச்சா எண்ணெய் மற்றும் எல்பிஜி (LPG) தேவையைப் பூர்த்தி செய்ய 20 பிரம்மாண்ட கப்பல்கள் பாதுகாப்பாகப் பயணித்து வருகின்றன.

உலகளாவிய கச்சா எண்ணெய் போக்குவரத்தில் சுமார் 20% முதல் 30% வரை இந்த குறுகிய கடல் பகுதி வழியாகவே நடைபெறுகிறது. ஈரான் இந்த ஜலசந்தியை மூடினால் உலகப் பொருளாதாரமே ஸ்தம்பிக்கும் அபாயம் உள்ளது. இருப்பினும், இந்தியாவின் ராஜதந்திர உறவுகள் காரணமாக இந்தியக் கப்பல்களுக்குப் பாதுகாப்பு உறுதி செய்யப்பட்டுள்ளது.

14 கப்பல்கள் சவுதி அரேபியா மற்றும் ஈராக்கில் இருந்து கச்சா எண்ணெயை ஏற்றி வருகின்றன. 6 கப்பல்கள் கத்தாரில் இருந்து சமையல் எரிவாயுவை ஏற்றி வருகின்றன. இந்தக் கப்பல்களில் உள்ள எரிபொருளின் மொத்த மதிப்பு சுமார் ₹12,000 கோடிக்கும் அதிகம் என மதிப்பிடப்பட்டுள்ளது. இந்தக் கப்பல்கள் பாதுகாப்பாக இந்தியக் கடற்பகுதியை வந்தடைய இந்தியக் கடற்படை தீவிரக் கண்காணிப்பில் ஈடுபட்டுள்ளது:

போர்க்கப்பல்கள் மற்றும் பி-8ஐ (P-8I) ரகக் கண்காணிப்பு விமானங்கள் மூலம் இந்தியக் கொடி ஏந்திய கப்பல்கள் கண்காணிக்கப்படுகின்றன. பாரசீக வளைகுடா பகுதியில் உள்ள இந்தியக் கப்பல்களுடன் இந்தியக் கடற்படையின் 'தகவல் இணைப்பு மையம்' (IFC-IOR) 24 மணிநேரமும் தொடர்பில் உள்ளது.

கத்தாரில் உள்ள ராஸ் லாஃபான் ஆலை மீது ஈரான் நடத்திய தாக்குதலால் உலகளவில் எரிவாயு தட்டுப்பாடு ஏற்படும் அபாயம் உள்ளது. இதை முன்கூட்டியே கணித்த இந்திய எண்ணெய் நிறுவனங்கள், ஏற்கனவே ஒப்பந்தம் செய்யப்பட்ட எரிபொருளை விரைவாக இந்தியா கொண்டு வர நடவடிக்கை எடுத்துள்ளன. இந்த 20 கப்பல்களும் அடுத்த 4 முதல் 7 நாட்களுக்குள் இந்தியத் துறைமுகங்களை வந்தடையும். இதன் மூலம் உள்நாட்டில் பெட்ரோல், டீசல் தட்டுப்பாடு தவிர்க்கப்படும். ரம்ஜான் பண்டிகை மற்றும் கோடைக் காலத் தேவையைப் பூர்த்தி செய்யப் போதுமான எல்பிஜி இருப்பு உறுதி செய்யப்படும்.