தவெக உட்கட்சிப் பூசல் வெடித்தது... அமைச்சர் கீர்த்தனா பங்கேற்ற விழாவில் பேனர் கிழிப்பு!

தமிழக முதலமைச்சர் விஜய்யின் பிறந்தநாள் விழா கொண்டாட்டங்களின் போது, விருதுநகர் மாவட்டம் சிவகாசியில் ஆளுங்கட்சியான தமிழக வெற்றிக் கழகத்தில் நிலவி வரும் உட்கட்சிப் பூசல் வீதிக்கு வந்துள்ளது. தவெக அமைச்சர் கீர்த்தனா கலந்துக் கொண்ட நலத்திட்ட உதவிகள் வழங்கும் விழாவில், கட்சியின் மற்றொரு பிரிவினர் பேனர்களைக் கிழித்து எறிந்ததால் இருதரப்புத் தொண்டர்களிடையே பெரும் மோதல் வெடித்துப் பரபரப்பை ஏற்படுத்தியுள்ளது.

முதலமைச்சர் விஜய்யின் பிறந்தநாளை முன்னிட்டு சிவகாசி சட்டமன்றத் தொகுதி தவெக-வில் கடந்த சில நாட்களாகவே கடுமையான பனிப்போர் நிலவி வந்தது. இத்தொகுதியில் சமூக நலத்துறை அமைச்சர் கீர்த்தனாவின் ஆதரவாளர்கள் ஒரு பிரிவாகவும், தவெக விருதுநகர் மேற்கு மாவட்டச் செயலாளர் மாரிச்செல்வத்தின் ஆதரவாளர்கள் மற்றொரு பிரிவாகவும் தனித்தனியாகப் போட்டி விழாக்களை ஏற்பாடு செய்து வந்துள்ளனர்.

நேற்று காலை சிவகாசி அருகே உள்ள விசுவநத்தம் பகுதியில் உள்ள ஒரு தனியார் திருமண மண்டபத்தில், அமைச்சர் கீர்த்தனா தரப்பு ஆதரவாளர்கள் சார்பில் ஏழை எளிய மக்களுக்கு நலத்திட்ட உதவிகள் வழங்கும் விழா பிரம்மாண்டமாக ஏற்பாடு செய்யப்பட்டிருந்தது.  இந்த விழாவிற்குச் சிறப்பு அழைப்பாளராகத் தவெக அமைச்சர் கீர்த்தனா நேரில் வருகை தந்து, மேடையில் பயனாளிகளுக்கு நலத்திட்ட உதவிகளை வழங்கிக் கொண்டிருந்தார்.

விழா விறுவிறுப்பாக நடைபெற்றுக் கொண்டிருந்த சமயத்தில், மண்டபத்தின் வெளிவாயிலில் மாவட்டச் செயலாளர் மாரிச்செல்வத்தின் ஆதரவாளர்கள் திடீரெனத் திரண்டனர். அவர்கள், தங்களது மாவட்டச் செயலாளரின் புகைப்படம் மற்றும் பெயர் விழாப் பேனர்களில் புறக்கணிக்கப்பட்டுள்ளதாகக் கூறி ஆக்ரோஷமாகக் கோஷமிட்டனர்.

வாக்குவாதம் முற்றிய நிலையில், மாரிச்செல்வத்தின் ஆதரவாளர்கள் மண்டபத்தின் முகப்பில் வைக்கப்பட்டிருந்த அமைச்சர் கீர்த்தனாவின் பிரம்மாண்ட விளம்பரப் பேனர்களைக் கத்தி மற்றும் கட்டைகளால் சரமாரியாகக் கிழித்து எறிந்தனர். இதனைப் பார்த்து அதிர்ச்சியடைந்த அமைச்சரின் ஆதரவாளர்கள் அவர்களைத் தடுக்க முயன்றபோது, இருதரப்பிற்கும் இடையே கைகலப்பு ஏற்பட்டுப் பயங்கர அடிதடி மோதலாக மாறியது.

மண்டபத்திற்குள் அமைச்சர் இருக்கும் போதே வெளியில் பேனர்கள் கிழிக்கப்பட்டுத் தொண்டர்கள் மோதிக் கொண்டதால் அங்குப் பெரும் பதற்றம் நிலவியது. தகவலறிந்து சம்பவ இடத்திற்கு விரைந்து வந்த சிவகாசி நகர் மற்றும் விசுவநத்தம் போலீசார், மோதலில் ஈடுபட்ட இருதரப்பினரையும் கலைக்க லேசான தடியடி நடத்தினர்.

இதனைத் தொடர்ந்து, விழா மேடையிலிருந்த அமைச்சர் கீர்த்தனா பலத்த போலீஸ் பாதுகாப்புடன் காரில் ஏற்றி அனுப்பி வைக்கப்பட்டார். முதலமைச்சர் விஜய் தலைமையில் தவெக புதிய அரசுப் பொறுப்பேற்ற சில வாரங்களிலேயே, அமைச்சருக்கும் மாவட்டச் செயலாளருக்கும் இடையே ஏற்பட்டுள்ள இந்த மோதல், பேனர் கிழிப்புச் சம்பவம் கட்சித் தலைமைக்கு அதிர்ச்சியை ஏற்படுத்தியுள்ளது.

இச்சம்பவம் குறித்துத் தவெக ஒழுங்கு நடவடிக்கைக் குழுத் தலைவர் உடனடியாக விசாரணையைத் தொடங்கியுள்ளதாகவும், முதலமைச்சரின் பிறந்தநாள் விழாவில் ஒழுங்கீனமாக நடந்து கொண்ட சிவகாசி உள்ளூர் நிர்வாகிகள் மீது இன்று மாலைக்குள் சஸ்பெண்ட் நடவடிக்கைகள் பாய வாய்ப்புள்ளதாகவும் சென்னை தலைமை நிலைய வட்டாரங்கள் தெரிவிக்கின்றன.