ஐபிஎல் 2026: ஐதராபாத்தை துவம்சம் செய்தது பெங்களூரு - கோலி 'விஸ்வரூபம்'... 16 ஓவர்களிலேயே இலக்கை எட்டி அசத்தல்!

ஐபிஎல் 19-வது சீசனின் தொடக்க ஆட்டத்தில் ரஜத் படிதார் தலைமையிலான பெங்களூரு அணியும், ஐதராபாத் அணியும் மோதின. டாஸ் வென்ற பெங்களூரு கேப்டன் பந்துவீச்சைத் தேர்வு செய்ய, முதலில் பேட்டிங் செய்த ஐதராபாத் அணி 20 ஓவர்களில் 9 விக்கெட் இழப்பிற்கு 201 ரன்கள் குவித்தது.

ஐதராபாத் அணியின் தொடக்க வீரர்கள் அடுத்தடுத்து ஆட்டமிழந்தாலும், இஷான் கிஷன் தனி ஆளாகப் போராடினார். சின்னசாமி மைதானத்தைச் சிக்சர் மழையில் நனைத்த அவர், 38 பந்துகளில் 80 ரன்கள் விளாசினார். இறுதியில் அனிகேத் சர்மாவின் (43 ரன்கள்) பங்களிப்போடு ஐதராபாத் 201 ரன்களை எட்டியது. பெங்களூரு தரப்பில் ஜேக்கப் டஃபி மற்றும் ஷெப்பர்ட் தலா 3 விக்கெட்டுகளை வீழ்த்தினர்.

சின்னாபின்னமான ஐதராபாத் பந்துவீச்சு:

202 ரன்கள் என்ற கடினமான இலக்குடன் களம் இறங்கிய பெங்களூரு அணிக்கு, விராட் கோலி மற்றும் படிக்கல் ஜோடி மின்னல் வேகத் தொடக்கத்தைக் கொடுத்தது. வெறும் 21 பந்துகளில் அரைசதம் அடித்து 61 ரன்களில் ஆட்டமிழந்தார். ஒருபுறம் விக்கெட்டுகள் விழுந்தாலும், நிதானமாகவும் அதே சமயம் அதிரடியாகவும் ஆடிய கோலி 33 பந்துகளில் அரைசதம் கடந்தார். கேப்டன் ரஜத் படிதார் (12 பந்துகளில் 31 ரன்கள்) அதிரடி காட்ட, பெங்களூரு அணி 15.4 ஓவர்களிலேயே 202 ரன்களை எட்டி 6 விக்கெட் வித்தியாசத்தில் அபார வெற்றி பெற்றது.

விராட் கோலி 38 பந்துகளில் 69 ரன்கள் எடுத்து இறுதிவரை ஆட்டமிழக்காமல் களத்தில் இருந்தார். இதன் மூலம் நடப்பு சாம்பியன் பெங்களூரு தனது முதல் போட்டியிலேயே வெற்றிக் கணக்கைத் தொடங்கியுள்ளது.

ஐதராபாத்: 201/9 (20 ஓவர்) - இஷான் கிஷன் 80 (38).

பெங்களூரு: 202/4 (15.4 ஓவர்) - கோலி 69* (38), படிக்கல் 61 (26).

பெங்களூரு 6 விக்கெட் வித்தியாசத்தில் வெற்றி.