அமெரிக்கப் போர் விமானத்திலிருந்து குதித்த விமானியைப் பிடித்துக் கொடுத்தால் $60,000 பரிசு - ஈரான் அறிவிப்பு!

ஈரான் வான் எல்லைக்குள் ஊடுருவித் தாக்குதல் நடத்த முயன்ற அமெரிக்காவின் F-15E ஸ்ட்ரைக் ஈகிள் போர் விமானத்தைத் தங்களது வான் பாதுகாப்பு அமைப்பு சுட்டு வீழ்த்தியதாக ஈரான் புரட்சிகர காவல்படை அறிவித்துள்ளது. இந்தச் சம்பவத்தைத் தொடர்ந்து, ஈரானியத் தொலைக்காட்சி ஒரு வினோதமான அறிவிப்பை வெளியிட்டுள்ளது.

ஈரானின் தென்மேற்குப் பகுதியில் உள்ள கோகிலுயே மற்றும் போயர்-அகமது மாகாணத்தில் இந்த விமானம் சுட்டு வீழ்த்தப்பட்டதாகக் கூறப்படுகிறது. விமானம் விழுந்து நொறுங்குவதற்கு முன்பே, அதில் இருந்த விமானி பாராசூட் மூலம் குதித்துத் தப்பியதாகத் தகவல்கள் தெரிவிக்கின்றன. அந்த மாகாணத்தைச் சேர்ந்த உள்ளூர் தொலைக்காட்சி சேனலில் பேசிய தொகுப்பாளர், "எதிரி நாட்டு விமானியை உயிருடன் பிடித்துப் போலீசாரிடம் ஒப்படைப்பவர்களுக்கு விலை உயர்ந்த மற்றும் மதிப்புமிக்கப் பரிசு வழங்கப்படும்" என்று அறிவித்தார். சில ஊடகத் தகவல்களின்படி, இந்தப் பரிசுத் தொகை சுமார் $60,000 (இந்திய மதிப்பில் சுமார் ₹50 லட்சம்) இருக்கலாம் என்று கூறப்படுகிறது.

ஆரம்பத்தில், "அமெரிக்க விமானிகளைக் கண்டதும் சுடுங்கள்" என்று அந்தத் தொலைக்காட்சி அறிவித்தது. ஆனால், சிறிது நேரத்திலேயே காவல்துறை வெளியிட்ட அறிக்கையைத் தொடர்ந்து, "விமானிகளை உயிருடன் பிடித்து ஒப்படையுங்கள்" என்று அந்த உத்தரவு மாற்றப்பட்டது. தற்போது அந்தப் பகுதிகளில் உள்ள மலைவாழ் மக்கள் மற்றும் பழங்குடியினர் துப்பாக்கிகளுடன் விமானியைத் தேடும் பணியில் இறங்கியுள்ளனர்.

இந்தச் சம்பவம் குறித்து அமெரிக்கத் தரப்பில் இதுவரை அதிகாரப்பூர்வமான விரிவான விளக்கம் அளிக்கப்படவில்லை. இருப்பினும், வெள்ளை மாளிகை செய்தித் தொடர்பாளர் கரோலின் லெவிட், "அதிபர் டிரம்ப் இந்தச் சூழல் குறித்துத் தொடர்ந்து கேட்டறிந்து வருகிறார்" என்று மட்டும் தெரிவித்துள்ளார். காணாமல் போன விமானியை மீட்க அமெரிக்கச் சிறப்புப் படைகள் ரகசியத் தேடுதல் வேட்டையில் ஈடுபட்டுள்ளதாகப் பாதுகாப்புத் துறை வட்டாரங்கள் தெரிவிக்கின்றன.

2026 போரின் தொடக்கத்திலிருந்து, ஈரானுக்குள் அமெரிக்கப் போர் விமானம் ஒன்று சுட்டு வீழ்த்தப்படுவது இதுவே முதல் முறை என்று கூறப்படுகிறது. இது இரு நாடுகளுக்கு இடையிலான மோதலை மேலும் தீவிரப்படுத்தும் எனக் கருதப்படுகிறது.