தனியாக விடப்படுவீர்கள்... நெதன்யாகுவுக்கு டிரம்ப் கடும் எச்சரிக்கை!

ஈரான் நாட்டுடன் மீண்டும் ஒரு முழு அளவிலான மோதலில் ஈடுபட வேண்டாம் என்றும், அவ்வாறு மோதலை தீவிரப்படுத்தினால் இஸ்ரேல் தனியாக நின்றுதான் போரிட வேண்டியிருக்கும் என்றும் அமெரிக்க அதிபர் டொனால்ட் டிரம்ப், இஸ்ரேல் பிரதமர் பெஞ்சமின் நெதன்யாகுவுக்குக் கடுமையான எச்சரிக்கை விடுத்துள்ளார். அண்மையில் ஈரான் மற்றும் இஸ்ரேல் நாடுகளுக்கு இடையே மீண்டும் ஏவுகணைத் தாக்குதல்கள் நடத்தப்பட்டு, மத்திய கிழக்கில் பதற்றம் அதிகரித்துள்ள சூழலில் இந்த முக்கியத் தகவல் வெளியாகியுள்ளது. இது தொடர்பாக ஊடகங்களுக்குப் பேட்டியளித்த அதிபர் டிரம்ப், தான் நெதன்யாகுவைத் தொலைபேசியில் தொடர்பு கொண்டு எச்சரித்த விபரத்தை உறுதிப்படுத்தியுள்ளார்.

அதிபர் டிரம்ப் தனது தொலைபேசி உரையாடலின் போது, "நெதன்யாகு, நீங்கள் மிகவும் கவனமாக இருக்க வேண்டும்; இல்லையெனில் விரைவில் நீங்கள் தனியாக ஈரான் நாட்டை எதிர்கொள்ள வேண்டிய நிலை ஏற்படும்" என்று நேரடியாகக் கூறியதாகத் தெரிவித்துள்ளார். ஈரானுடன் ஒரு நிரந்தர அமைதி உடன்படிக்கையை ஏற்படுத்துவதற்கான பேச்சுவார்த்தைகளில் அமெரிக்கா ஈடுபட்டு வரும் வேளையில், இஸ்ரேல் தன்னிச்சையாகத் தாக்குதல் நடத்துவது அமைதிப் பணிகளைப் பாதிக்கும் என டிரம்ப் கருதுகிறார். மேலும், இந்தப் பிராந்தியத்தைச் சேர்ந்த 5 நாடுகள் தன்னிடம் வந்து, இஸ்ரேல் நடத்தும் தாக்குதல்களை நிறுத்துமாறு நெதன்யாகுவுக்கு அழுத்தம் கொடுக்குமாறு கேட்டுக்கொண்டதாகவும் டிரம்ப் குறிப்பிட்டுள்ளார்.

அமெரிக்க அதிபரின் இந்த கடுமையான அழுத்தத்தைத் தொடர்ந்து, ஈரானுக்கு எதிராகப் போர் விமானங்களுடன் ஏவுதளத்தில் தயாராக இருந்த பெரிய அளவிலான தாக்குதல் திட்டத்தை நெதன்யாகு கடைசி நேரத்தில் கைவிட்டுள்ளதாகத் தகவல்கள் தெரிவிக்கின்றன. இதன் தொடர்ச்சியாக, ஈரான் மற்றும் இஸ்ரேல் ஆகிய இரு நாடுகளும் தற்போதைக்குத் தங்களின் பரஸ்பரத் தாக்குதல்களை நிறுத்திக் கொள்வதாக அதிகாரப்பூர்வமாக அறிவித்துள்ளன.