தலைமைத் தேர்தல் ஆணையரை பதவியில் இருந்து நீக்கக் கோரி கேரள சட்டப்பேரவையில் தீர்மானம் நிறைவேற்றம்!
தலைமைத் தேர்தல் ஆணையர் ஞானேஷ் குமார் தனது பதவியிலிருந்து உடனடியாக விலக வேண்டும் என்பதை வலியுறுத்தி, கேரள சட்டப்பேரவையில் ஒரு வரலாற்றுச் சிறப்புமிக்க தீர்மானம் நிறைவேற்றப்பட்டுள்ளது. முதலமைச்சர் வி.டி. சதீசன் இந்தத் தீர்மானத்தை முன்மொழிந்து உரையாற்றியதைத் தொடர்ந்து, நாட்டின் பல்வேறு பகுதிகளில் எழுந்த விவாதங்களுக்கு மத்தியில் இம்மாநிலம் இத்தகைய அதிரடி நடவடிக்கையை எடுத்துள்ளது.
நாடு முழுவதும் பெரும் சர்ச்சையை ஏற்படுத்தியுள்ள வாக்காளர் பட்டியலின் சிறப்புத் தீவிரத் திருத்தப் பணியில் கடுமையான முறைகேடுகள் நடந்துள்ளதாகத் தீர்மானத்தில் சுட்டிக்காட்டப்பட்டுள்ளது. தகுதியுள்ள கோடிக்கணக்கான வாக்காளர்களின் பெயர்கள் உரிய அறிவிப்பின்றி தன்னிச்சையாக நீக்கப்பட்டிருப்பது ஜனநாயக முறைக்கு எதிரானது என்றும் தெரிவிக்கப்பட்டது.
தேர்தல் ஆணையத்தின் நடுநிலைக் தன்மை கேள்விக்குள்ளாகி விட்டதால், தலைமைத் தேர்தல் ஆணையர் ஞானேஷ் குமாரை பதவியில் இருந்து நீக்க மத்திய அரசு உரிய நடவடிக்கைகளை எடுக்க வேண்டும் என்று இந்தத் தீர்மானம் வலியுறுத்துகிறது. மேலும், முறைகேடுகளால் பாதிக்கப்பட்ட தகுதியான அனைத்து வாக்காளர்களின் வாக்குரிமையையும் உடனடியாக மீட்டெடுக்க வேண்டும் எனவும் கோரப்பட்டுள்ளது.
தேர்தல் ஆணையர்களைத் தேர்ந்தெடுக்கும் உயர்மட்டக் குழுவில் உச்சநீதிமன்றத் தலைமை நீதிபதியை மீண்டும் இணைக்க வேண்டும் என்ற கோரிக்கையும் இப்படத்தில் வலுவாக எழுப்பப்பட்டுள்ளது. தற்போதைய தேர்வு முறையில் உச்சநீதிமன்றத் தலைமை நீதிபதி நீக்கப்பட்டிருப்பது தேர்தல் அமைப்பின் சுயாட்சியைக் கேள்விக்குள்ளாக்குவதாகச் சட்டப்பேரவையில் வாதிடப்பட்டது.
கேரள சட்டப்பேரவையில் பெரும்பான்மை உறுப்பினர்களின் ஆதரவுடன் இந்தத் தீர்மானம் நிறைவேற்றப்பட்ட போதிலும், அவையிலிருந்த மூன்று பாஜக சட்டமன்ற உறுப்பினர்கள் இதற்குைக் கடுமையான எதிர்ப்புத் தெரிவித்துத் தங்களது மாற்று நிலைப்பாட்டைப் பதிவு செய்தனர். தேர்தல் ஆணையம் போன்ற தன்னாட்சி அமைப்புகளுக்கு எதிராக இதுபோன்ற அரசியல் நோக்கிலான தீர்மானங்கள் கொண்டுவரப்படுவது ஏற்புடையதல்ல என்று அவர்கள் வாதிட்டனர்.
நாட்டின் ஒரு மாநிலச் சட்டப்பேரவை தலைமைத் தேர்தல் ஆணையரை அகற்றக் கோரி அதிகாரப்பூர்வமாகத் தீர்மானம் நிறைவேற்றியிருப்பது தேசிய அரசியலில் பெரும் அதிர்வலைகளை ஏற்படுத்தியுள்ளது.