நிரந்தர பாதுகாப்பு கட்டமைப்புகளை உருவாக்குங்க... கோவை சிறுமி கொலைக்கு ராமதாஸ் கண்டனம்!

கோவை மாவட்டம் சூலூரை அடுத்த பள்ளப்பாளையம் பகுதியில் பத்து வயது சிறுமி கடத்தப்பட்டு, கொடூரமாகப் படுகொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. தமிழகத்தையே உலுக்கியுள்ள இந்த கொடூரச் செயலுக்கு பாட்டாளி மக்கள் கட்சியின் நிறுவனர் மருத்துவர் ராமதாஸ் தனது கடுமையான கண்டனத்தை எக்ஸ் சமூக வலைத்தளப் பக்கத்தில் பதிவு செய்துள்ளார். மகளை இழந்து வாடும் பெற்றோர் மற்றும் உறவினர்களுக்குத் தனது ஆழ்ந்த இரங்கலையும் ஆறுதலையும் அவர் தெரிவித்துள்ளார்.

பெண்களுக்கும் குழந்தைகளுக்கும் எதிரான குற்றங்கள் தொடர்ந்து அதிகரித்து வருவது கவலையளிப்பதாகக் குறிப்பிட்டுள்ள அவர், வெறும் தற்காலிக நடவடிக்கைகளால் மட்டும் இந்தத் தீமையைத் தடுத்து நிறுத்த முடியாது என்று சுட்டிக்காட்டியுள்ளார். தமிழகத்தில் இனிமேல் இது போன்ற கொடூரச் சம்பவங்கள் மீண்டும் ஒருபோதும் நிகழாத வண்ணம், பெண்களின் பாதுகாப்பை உறுதி செய்யத் தேவையான நிரந்தர பாதுகாப்பு கட்டமைப்புகளைத் தமிழக அரசு உடனடியாக உருவாக்க வேண்டும் என்று அவர் வலியுறுத்தியுள்ளார்.

இந்தக் கொடூரமான குற்றச் செயலில் ஈடுபட்ட சமூக விரோதிகளைச் சட்டத்தின் முன் நிறுத்தி, அவர்களுக்கு மிகக் கடுமையான தண்டனை பெற்றுத் தருவதை அரசு உடனடியாக உறுதி செய்ய வேண்டும் என்றும் அவர் கேட்டுக் கொண்டுள்ளார். குழந்தைகளைப் பாதுகாப்பதிலும், குற்றவாளிகளுக்கு அச்சத்தை ஏற்படுத்துவதிலும் காவல்துறையினர் இன்னும் கூடுதல் கவனத்துடனும் தீவிரத்துடனும் செயல்பட வேண்டும் என்றும் மருத்துவர் ராமதாஸ் தனது அறிக்கையின் வாயிலாகத் தெரிவித்துள்ளார்.