பயங்கரம்... ரியல் எஸ்டேட் அதிபர் வெட்டிக் கொலை... மர்ம கும்பல் வெறிச்செயல்!

கிருஷ்ணகிரி மாவட்டம் போச்சம்பள்ளி அருகே நிலம் பார்க்கச் சென்ற ரியல் எஸ்டேட் அதிபர், மர்ம நபர்களால் மிகக் கொடூரமான முறையில் வெட்டிக் கொலை செய்யப்பட்ட சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது. போச்சம்பள்ளியைச் சேர்ந்த சத்தியசீலன் என்பவர், நேற்று காலை தனக்குச் சொந்தமான மற்றொரு நிலத்தைப் பார்வையிடச் சென்றபோது இந்தத் துயரச் சம்பவம் நிகழ்ந்துள்ளது. நீண்ட நேரமாகியும் அவர் வீடு திரும்பாததால் உறவினர்கள் தேடிச் சென்றபோது, அவர் ரத்த வெள்ளத்தில் சடலமாகக் கிடந்ததைக் கண்டு அதிர்ச்சியடைந்தனர்.

தகவலறிந்து சம்பவ இடத்திற்கு விரைந்து வந்த மாவட்ட காவல் கண்காணிப்பாளர் தங்கதுரை தலைமையிலான போலீசார், மோப்ப நாய் மற்றும் கைரேகை நிபுணர்களை வரவழைத்துத் தீவிர சோதனையில் ஈடுபட்டனர். சத்தியசீலனின் தலையில் பலத்த வெட்டுக் காயங்கள் இருந்ததால், முன்விரோதம் காரணமாக மர்ம கும்பல் அவரைச் சரமாரியாக வெட்டிக் கொன்றிருப்பது முதற்கட்ட விசாரணையில் தெரியவந்துள்ளது. மோப்ப நாய் சிறிது தூரம் ஓடிச் சென்று நின்ற நிலையில், அங்குப் பதிவாகியிருந்த தடயங்களை போலீசார் சேகரித்துள்ளனர்.

போலீசார் அவரது உடலை மீட்டுப் பிரேதப் பரிசோதனைக்காகக் கிருஷ்ணகிரி அரசு மருத்துவமனைக்கு அனுப்பி வைத்துள்ளனர். தொழில் போட்டி அல்லது நிலத் தகராறு காரணமாக இந்தக் கொலை நடந்திருக்கலாம் என்ற கோணத்தில் போலீசார் விசாரணையைத் தீவிரப்படுத்தியுள்ளனர். பட்டப்பகலில் நடந்த இந்தத் துணிகரக் கொலைச் சம்பவம் போச்சம்பள்ளி மற்றும் அதன் சுற்றுவட்டாரப் பகுதிகளில் வசிக்கும் பொதுமக்களிடையே பெரும் அச்சத்தை ஏற்படுத்தியுள்ளது.