தமிழகத்தில் பெருகும் பாலியல் குற்றங்கள்... புதிய சமுதாய மாற்றத்திற்கு லதா ரஜினிகாந்த் உருக்கமான வேண்டுகோள்!!

தமிழகத்தில் பெண்கள் மற்றும் குழந்தைகளுக்கு எதிராகத் தொடர்ந்து அரங்கேறி வரும் கொடூரமான குற்றங்கள் குறித்து நடிகர் ரஜினிகாந்தின் மனைவியும், சமூக ஆர்வலருமான லதா ரஜினிகாந்த் மிகுந்த வேதனையுடன் அறிக்கை ஒன்றை வெளியிட்டுள்ளார். நாம் அனைவரும் எந்நேரமும் கைபேசி போன்ற பொழுதுபோக்கு விஷயங்களில் மூழ்கி இருப்பதால், சமுதாயத்திற்குத் தேவையான நல்ல காரியங்களில் ஈடுபடுவதைக் குறைத்துக் கொண்டுள்ளோம் என்று அவர் சாடியுள்ளார். சமுதாயத்தில் எவ்வித பொறுப்பும் இல்லாத ஒரு சில விஷமிகள் தான், பச்சிளம் குழந்தைகள் மீது இது போன்ற வன்கொடுமைகளில் தொடர்ந்து ஈடுபட்டு வருகின்றனர் என அவர் குற்றம் சாட்டியுள்ளார்.

பெற்றோர்களின் அதீத கவனக்குறைவும், தங்களின் குழந்தைகளுக்குத் தேவையான முறையான பாதுகாப்பு நடவடிக்கைகளை எடுக்காததும் தான், பிஞ்சு குழந்தைகள் பாலியல் துன்புறுத்தலில் சிக்கிச் சீரழிந்து போவதற்கு முக்கிய காரணமாக விளங்குகிறது. குப்பைத்தொட்டியில் வீசப்பட்ட குழந்தைகள், ஆதரவற்ற மற்றும் காணாமல் போன குழந்தைகள் என்றிருந்த பழைய நிலைமை ஒட்டுமொத்தமாக மாறிப்போய்விட்டது என அவர் கவலை தெரிவித்துள்ளார். தற்போதைய காலகட்டத்தில் யார் வேண்டுமானாலும், எப்போது வேண்டுமானாலும் ஒரு குழந்தையைத் தூக்கிக்கொண்டு சென்று நாசம் செய்யக்கூடிய மிக மோசமான சமுதாயச் சூழல் நிலவி வருவதாக அவர் தெரிவித்துள்ளார்.

பாதிக்கப்பட்ட பச்சிளம் குழந்தைகள் காம மிருகங்களிடம் சிக்கித் தவிக்கும் போது, தங்களைக் காப்பாற்ற யாரும் இல்லையா என்று யாரிடம் போய் அழுது கேட்கும் என அவர் நெஞ்சை உலுக்கும் கேள்வியைக் கேட்டுள்ளார். ஒரு குழந்தை பாதிக்கப்பட்டாலும் அது ஒட்டுமொத்த சமுதாயத்திற்கும் கேடு விளைவிக்கும் என்பதை அனைவரும் நினைவில் கொள்ள வேண்டும் என்றும், பாதுகாப்பு என்பது நம் அனைவருடைய கூட்டுப் பொறுப்பாகும் என்றும் அவர் வலியுறுத்தியுள்ளார். எனவே நம் நாட்டு இளைஞர்களின் சக்தியை நல்ல காரியங்களுக்காக மட்டுமே செலவழிக்கும் புதிய கலாச்சாரத்தை நாம் உடனடியாக வளர்க்க வேண்டும் என ஒட்டுமொத்த மக்களுக்கும் லதா ரஜினிகாந்த் வேண்டுகோள் விடுத்துள்ளார்.