“திமுகவைப் போல் தவெக ஆட்சியும் கலைக்கப்படுவது உறுதி!” - இன்பதுரை பேட்டி!

"கடந்த 1991-ஆம் ஆண்டில் திமுக ஆட்சி கலைக்கப்பட்டதைப் போலவே, தற்போதைய தமிழக வெற்றிக் கழகத்தின் (தவெக) ஆட்சியும் கவிழும் சூழல் உறுதியாகியுள்ளது" என்று அதிமுக நாடாளுமன்ற உறுப்பினர் இன்பதுரை குற்றம் சாட்டியுள்ளார். தவெக அரசுக்கு எதிராக ஆளுநரை நேரில் சந்தித்துப் புகார் அளித்த பின்னர் அவர் செய்தியாளர்களிடம் இவ்வாறு தெரிவித்தார்.

தமிழ்நாடு அரசியல் களத்தில் ஆளும் தவெக மற்றும் எதிர்க்கட்சியான அதிமுக இடையே கடுமையான மோதல் போக்கு நிலவி வரும் சூழலில், அதிமுக எம்பி இன்பதுரை ஆளுநரைச் சந்தித்து அளித்த புகார் மனுவில், "தமிழக வெற்றிக் கழகம் தங்களது அரசியல் பலத்தைப் பெருக்குவதற்காக, அதிமுக சட்டமன்ற உறுப்பினர்களைக் கோடிக்கணக்கான ரூபாய் கொடுத்துக் குதிரை பேரம் மூலமாக விலைக்கு வாங்கி வருகிறது. இது சனநாயகப் படுகொலை ஆகும்" என குறிப்பிட்டுள்ளார்.

அண்மையில் நடைபெற்ற தமிழக அமைச்சரவைக் கூட்டம் குறித்துப் பேசிய இன்பதுரை, தவெக அரசு ரகசியக் காப்புப் பிரமாணத்தை மீறிவிட்டதாக அடுக்கடுக்கான புகார்களை முன்வைத்தார். "அரசியலமைப்புச் சட்டத்தின்படி அமைச்சர்கள் மட்டுமே பங்கேற்க வேண்டிய அமைச்சரவைக் கூட்டத்தில், அரசுப் பொறுப்பில் இல்லாத விஷ்ணு ரெட்டி மற்றும் ஜான் ஆரோக்கியசாமி ஆகியோர் பங்கேற்றுள்ளனர். இது முதலமைச்சர் மற்றும் அமைச்சர்கள் எடுத்துக்கொண்ட ரகசியக் காப்புப் பிரமாணத்தை அப்பட்டமாக மீறும் செயலாகும். இதன் மூலம் தமிழக அரசின் மிக முக்கிய ரகசியங்கள் மற்றும் கொள்கை முடிவுகள் வெளிநபர்களுக்குக் கசிந்துள்ளன."

முன்னாள் அதிமுக அமைச்சர்கள் சி. விஜயபாஸ்கர், வைகைச்செல்வன் ஆகியோர் தவெக-வில் இணைந்துள்ள அரசியல் சூழலில், 1991-இல் சட்டம் ஒழுங்குப் பிரச்சினையைக் காரணம் காட்டி திமுக ஆட்சி கலைக்கப்பட்ட வரலாற்றுச் சம்பவத்தை இன்பதுரை சுட்டிக் காட்டியுள்ளார்.

தற்போதைய தவெக அரசின் இந்த விதிகளை மீறிய செயல்பாடுகள் மற்றும் குதிரை பேர நடவடிக்கைகள் காரணமாக, இந்த ஆட்சியும் மிக விரைவில் கலைக்கப்படுவது உறுதி என அவர் எச்சரித்துள்ளார். அதிமுக எம்பியின் இந்த ஆளுநர் சந்திப்பு மற்றும் கடுமையான குற்றச்சாட்டுகள் தமிழக அரசியல் வட்டாரத்தில் பெரும் பரப்பரப்பை ஏற்படுத்தியுள்ளது.