மதுரையில் பயங்கரம்! பைக்கில் சென்ற இளைஞர்களை காரில் துரத்தி வெட்டிக்கொலை முயற்சி – ஒருவர் பலி!

மதுரையில் பைக்கில் சென்ற இளைஞர்களை காரில் துரத்திச் சென்று மோதிக் கீழே தள்ளி, ஆயுதங்களால் தாக்கிய சம்பவத்தில் ஒருவர் உயிரிழந்தார். மற்றொரு இளைஞர் படுகாயமடைந்து உயிருக்கு ஆபத்தான நிலையில் மருத்துவமனையில் சிகிச்சை பெற்று வருகிறார்.

காரில் துரத்திச் சென்று தாக்குதல்

மதுரை மாவட்டம் விராதனூர் பகுதியில் உள்ள சத்யாநகர் அருகே நேற்று நள்ளிரவு தினேஷ், சந்தோஷ்குமார் ஆகிய இரு இளைஞர்கள் பைக்கில் சென்று கொண்டிருந்தனர். அப்போது காரில் வந்த மர்ம கும்பல், அவர்களின் பைக்கைத் துரத்திச் சென்றதாகக் கூறப்படுகிறது. வேகமாகச் சென்ற பைக் மீது காரை மோதியதில் இருவரும் நிலைதடுமாறி சாலையில் விழுந்தனர்.

இதையடுத்து காரில் இருந்து இறங்கிய கும்பல், கத்தி, அரிவாள் உள்ளிட்ட ஆயுதங்களால் இருவரையும் சரமாரியாகத் தாக்கியதாக போலீசார் தெரிவித்துள்ளனர். இதில் சந்தோஷ்குமார் சம்பவ இடத்திலேயே உயிரிழந்தார். படுகாயமடைந்த தினேஷை போலீசார் மீட்டு மதுரை ராஜாஜி அரசு மருத்துவமனைக்கு அனுப்பி வைத்தனர். அங்கு அவருக்குத் தீவிர சிகிச்சை அளிக்கப்பட்டு வருகிறது.

மர்ம கும்பலுக்கு போலீசார் வலைவீச்சு

சம்பவம் தொடர்பாக வழக்குப்பதிவு செய்த போலீசார், தப்பியோடிய கும்பலைத் தேடி வருகின்றனர். இந்தக் கொலை முன்பகை காரணமாக நடந்ததா அல்லது வேறு ஏதேனும் காரணம் உள்ளதா என்பது குறித்து விசாரணை நடைபெற்று வருகிறது. பைக்கில் சென்ற இளைஞர்களை காரில் துரத்தி ஆயுதங்களால் தாக்கிய சம்பவம் மதுரையில் அதிர்ச்சியை ஏற்படுத்தியுள்ளது.