தலைமைத் தேர்தல் ஆணையர் ஞானேஷ் குமார் பதவி விலகக் கோரி டெல்லியில் நடைபெற்ற போராட்டத்தின்போது, திரிணாமுல் காங்கிரஸ் தலைவரும், மேற்கு வங்க முன்னாள் முதல்-அமைச்சருமான மம்தா பானர்ஜியை போலீசார் தடுத்து வைத்தனர். அவருடன் அக்கட்சியின் மூத்த தலைவர்களான டெரிக் ஓ பிரையன், டோலா சென் உள்ளிட்டோரும் தடுத்து வைக்கப்பட்டனர்.

டெல்லியின் சவுத் அவென்யூ பகுதியில் இன்று (அக்.10) இந்தப் போராட்டம் நடைபெற்றது. தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று வலியுறுத்தி எதிர்க்கட்சித் தலைவர்கள் போராட்டத்தில் ஈடுபட்டனர்.

அப்போது மம்தா பானர்ஜி உள்ளிட்ட திரிணாமுல் காங்கிரஸ் தலைவர்கள் ஆர்ப்பாட்டத்தில் பங்கேற்றனர். இதையடுத்து, போலீசார் அவர்களைத் தடுத்து வைத்து வேறு இடத்துக்கு அழைத்துச் சென்றதாகத் தகவல்கள் தெரிவிக்கின்றன.

View this post on Instagram

A post shared by The Cord Bharat ( भारत ) (@thecord.in)

வாயில் பேண்டேஜ் ஒட்டி மம்தா போராட்டம்

போராட்டத்தின்போது மம்தா பானர்ஜி தனது வாயில் பேண்டேஜ் ஒட்டிக்கொண்டு எதிர்ப்பை வெளிப்படுத்தியதாகச் செய்திகள் தெரிவிக்கின்றன. ஜனநாயக உரிமைகள் மற்றும் எதிர்ப்புக் குரல்களை வெளிப்படுத்தும் உரிமை குறித்த தனது கவலையை அவர் இவ்வாறு வெளிப்படுத்தியதாகக் கூறப்படுகிறது.

இந்த நடவடிக்கையைத் தொடர்ந்து, டெல்லியில் எதிர்க்கட்சித் தலைவர்கள் தடுத்து வைக்கப்பட்ட சம்பவம் அரசியல் வட்டாரத்தில் கவனம் பெற்றுள்ளது. தேர்தல் ஆணையத்தின் செயல்பாடுகள் மற்றும் வாக்காளர் பட்டியல் திருத்தம் தொடர்பான விவகாரங்களை முன்வைத்து எதிர்க்கட்சிகள் தொடர்ந்து விமர்சனங்களைத் தெரிவித்து வருகின்றன.

போராட்டத்தில் பங்கேற்ற தலைவர்களைத் தடுத்து வைத்ததற்கான போலீசாரின் விரிவான விளக்கம் வெளியாகும் நிலையில், இந்தச் சம்பவம் தொடர்பான அரசியல் விவாதம் மேலும் தீவிரமடைந்துள்ளது.